Máskeýde qazaqstandyq startap iesi Aleksandr Kim men Nikita Dýbasqa qatysty sot úkimi shyqty, dep habarlaidy Dalanews.kz.
Bul týraly reseilik BAQ-tar Meshanskii sotynyń baspasóz qyzmetine silteme jasap habarlaidy.
Kim men Dýbas bir top adamdy aldyn ala sóz bailasý arqyly jasaǵan jáne abaisyzda eki nemese odan da kóp adamnyń ólimine ákelip soqtyrǵan, tutynýshylardyń ómiri men densaýlyǵynyń qaýipsizdigi talaptaryna sáikes kelmeitin qyzmetterdi kórsetkeni úshin kináli dep tanyldy.
"Kimge jalpy rejimdegi túzeý koloniiasynda jazasyn ótei otyryp, bes jyl, alty ai, Dýbasqa segiz jyl, alty ai merzimge bas bostandyǵynan aiyrý jazasy taǵaiyndaldy", delingen sot habarlamasynda.
Al segiz adam qaza tapqan zańsyz ekskýrsiiaǵa arnalǵan týr biletterin satqan "Avangard" kompaniiasynyń direktory Aleksandr Lazovskii men Tripster saitynyń iesi Boris Plotitsa (osy saitta ekskýrsiia jarnamasy usynylǵan) tergeý kezinde izin sýytyp, áli de izdeýde.
Aita ketsek, atalǵan qaiǵyly oqiǵa 2023 jyldyń 20 tamyzynda bolǵan. Gidtiń jetekshiligimen bes eresek pen úsh jasóspirim baiyrǵy zamanda Neglinnaia ózeni aqqan arnaǵa salynǵan kollektorǵa túsken. Sol kezde kenetten nóser jańbyr jaýyp, jer asty qubyry sýǵa tolǵan. Qaza tapqandardyń deneleri Kreml mańynda, týristik oryn — aspaly kópir astynda sý betine shyqqan. Tótenshe jaǵdai qoǵamda úlken rezonans týdyrdy. Ekskýrsiiaǵa qatysýshylardyń qaza bolýyna bailanysty qylmystyq is qozǵaldy. Tergeý málimetteri boiynsha, Dýbas "Máskeýdiń tarihi ortalyǵynyń kollektorlaryna zańsyz kirý arqyly ekskýrsiialar uiymdastyrǵan".
Marqumdar Qazaqstan azamaty Aleksandr Kim jasaǵan "Spýtnik8" onlain-agregatory arqyly osyndai ekskýrsiialardyń birine jazylǵan. BAQ málimetinshe, Kim óz kinásin moiyndamaǵan, ol óziniń tek týr agregatoryn ázirleýshi ekenin, zańsyz uiymdastyrylǵan týrdyń ózine eshqandai qatysy joq ekenin aitqan. Ári qaiǵyly jaǵdai týraly bile salysymen qazaqstandyq dereý quqyq qorǵaý organdarymen bailanysqa shyǵyp, barlyq qajetti aqparatty usynǵan.
