Qazaqstanda kórineý jalǵan aqparat taratqany úshin qylmystyq jaýapkershilikti alyp tastaý máselesi qarastyrylyp jatyr, dep habarlaıdy Dalanews.kz.

Qazir bul norma Qylmystyq kodekstiń 274-babynda kózdelgen.

Mádenıet jáne aqparat vıse-mınıstri Qanat Ysqaqov jýrnalıserdiń suraǵyna jaýap bere otyryp, atalǵan bapqa qatysty syn-pikirler jıi aıtylatynyn jetkizdi. Kópshilik bul normanyń keı jaǵdaıda buqaralyq aqparat quraldary ókilderine qarsy qoldanylatynyn alǵa tartady.

Onyń aıtýynsha, vedomstvo ishinde osy normany dekrımınalızasıalaý máselesi talqylanyp jatyr. Iaǵnı, atalǵan quqyqbuzýshylyq úshin jaýapkershilikti qylmystyq zańnamadan alyp tastaý múmkindigi qarastyrylýda.