2026 jyldyń I toqsany boiynsha memlekettik biýdjettiń kirister jospary (transfertterdi eseptemegende) 104,4%-ǵa oryndaldy. Jospar 6 176,2 mlrd teńge bolsa, biýdjetke 6 444,9 mlrd teńge tústi, iaǵni 268,7 mlrd teńgege artyq jinaldy, dep habarlaidy Dalanews.kz.
2025 jyldyń osy kezeńimen salystyrǵanda memlekettik biýdjet kiristeri 930,6 mlrd teńgege nemese 16,9%-ǵa artty. Kirister josparynyń asyra oryndalýy respýblikalyq jáne jergilikti biýdjetterde de tirkeldi. Jyl qorytyndysy boiynsha biýdjetke 18,886 trln teńge jinaý josparlanyp otyr, bul 2025 jylǵy naqty túsimderden 4,4 trln teńgege kóp ekenin UEM eske saldy.
Respýblikalyq biýdjettiń kiristeri 101,8%-ǵa oryndaldy: jospar 4 085,6 mlrd teńge bolsa, naqty 4 159,4 mlrd teńge tústi. Ótken jylmen salystyrǵanda ósim 26,1%-dy (+861,8 mlrd teńge) qurady. Bul kóbine Qazaqstannyń negizgi eksporttyq taýarlaryna álemdik naryqtaǵy baǵanyń ósýimen, 2025 jyldyń IV toqsanynda ESF júiesinde tirkelgen taýarlar men qyzmetterdi ótkizýdiń artýymen, sondai-aq salyq jáne kedendik ákimshilendirý nátijelerimen bailanysty.
Respýblikalyq biýdjet kiristeriniń negizgi bóligin (98%) quraityn salyqtyq túsimder 101,6%-ǵa oryndaldy: jospar 4 012,8 mlrd teńge bolsa, naqty 4 077,6 mlrd teńge tústi. Ótken jyldyń sáikes kezeńimen salystyrǵanda ósim 31,5%-dy qurady. QQS 2025 jyldyń IV toqsany úshin 12% mólsherlememen jinaldy.
Ósim myna salyqtar boiynsha tirkeldi:
- KTS +16,9%
- Importtalatyn taýarlarǵa QQS (16% mólsherleme boiynsha) +24,2%
- Paidaly qazbalardy óndirýge salynatyn salyq (NDPI) +35,7%
Jergilikti biýdjetterdiń kiristeri 109,3%-ǵa oryndaldy: jospar 2 090,6 mlrd teńge bolsa, naqty 2 285,5 mlrd teńge tústi. Ótken jylmen salystyrǵanda ósim 3,1%-dy (+68,8 mlrd teńge) qurady.
Jyl basynan beri ózin-ózi jumyspen qamtyǵandarǵa arnalǵan arnaiy salyq rejimi boiynsha 392 myń jeke tulǵa tirkeldi. QQS tóleýshiler sany 10 myń sýbektige artty.
