Qazaqstanda qańǵybas itterge qatysty tásil ózgerýi múmkin: májilis tiisti zań jobasyn qabyldady, dep habarlaidy Dala News.
Májilis depýtaty Edil Janbyrshinniń aitýynsha, qujatta qańǵybas itterdi burynǵydai ustap, qaitadan tabiǵi ortasyna jiberý tájiribesinen bas tartyp, qaitarymsyz aýlaý modeline kóshý usynylǵan.
Onyń sózinshe, ustalǵan janýarlardy mindetti túrde ýaqytsha ustaý merzimi engiziledi. Bastapqyda bul merzim 15 kún bolyp usynylǵanymen, talqylaýlar barysynda eń tómengi shek keminde 5 kún bolyp belgilengen. Sonymen qatar máslihattarǵa bul merzimdi ulǵaitý quqyǵy berilmek.
Depýtattyń málimetinshe, iesi bolýy múmkin janýarlarǵa qatysty ustaý merzimi 60 kúnge deiin qarastyrylǵan.
Sondai-aq, onyń aitýynsha, jergilikti atqarýshy organdar sheshim qabyldaǵan jaǵdaida janýarlardy uzaq ýaqyt ustaý, jańa ielerine berý nemese panajailarda tabiǵi ólimine deiin kútip-baǵý múmkindigi qarastyrylady.
Janbyrshinniń deregine sáikes, sońǵy bir jylda itterdiń shabýylynan 41 366 adam zardap shekken. Onyń ishinde 23 134 adam qańǵybas itterdiń kesirinen zardap shekkeni aityldy.
Zań jobasynda jergilikti atqarýshy organdarǵa – respýblikalyq mańyzy bar qalalar, astana, aýdandar men oblystyq mańyzy bar qalalar ákimdikterine – janýarlardyń agressiiasyn jedel túrde toqtatý boiynsha shuǵyl áreket etý sharalaryn uiymdastyrý quzyreti beriletini kórsetilgen.
Al qańǵybas mysyqtarǵa qatysty gýmanistik tásil saqtalady. Depýtattyń aitýynsha, halyqaralyq tájiribe men táýekelder taldaýyn eskere otyryp, olardy qaitadan ortaǵa jiberý modeli ózgerissiz qaldyrylǵan.
Májiliste bul zań jobasy qańǵybas itterdiń sanyn azaityp, adamdarǵa jáne basqa janýarlarǵa shabýyl sanyn qysqartýǵa múmkindik beredi degen pikir aityldy.
Sonymen qatar depýtattar janýarlarǵa qatygezdik kórsetkeni úshin ákimshilik jáne qylmystyq jaýapkershilikti kúsheitý máselesin de talqylaǵan. Alaida bul normalar atalǵan zań jobasyna engizilmegeni naqtylandy.
