قازاقستاندا قاڭعىباس يتتەرگە قاتىستى ءتاسىل وزگەرۋى مۇمكىن: ءماجىلىس ءتيىستى زاڭ جوباسىن قابىلدادى، دەپ حابارلايدى Dala News.

ءماجىلىس دەپۋتاتى ەدىل ءجانبىرشيننىڭ ايتۋىنشا، قۇجاتتا قاڭعىباس يتتەردى بۇرىنعىداي ۇستاپ، قايتادان تابيعي ورتاسىنا جىبەرۋ تاجىريبەسىنەن باس تارتىپ، قايتارىمسىز اۋلاۋ مودەلىنە كوشۋ ۇسىنىلعان.

ونىڭ سوزىنشە، ۇستالعان جانۋارلاردى مىندەتتى تۇردە ۋاقىتشا ۇستاۋ مەرزىمى ەنگىزىلەدى. باستاپقىدا بۇل مەرزىم 15 كۇن بولىپ ۇسىنىلعانىمەن، تالقىلاۋلار بارىسىندا ەڭ تومەنگى شەك كەمىندە 5 كۇن بولىپ بەلگىلەنگەن. سونىمەن قاتار ءماسليحاتتارعا بۇل مەرزىمدى ۇلعايتۋ قۇقىعى بەرىلمەك.

دەپۋتاتتىڭ مالىمەتىنشە، يەسى بولۋى مۇمكىن جانۋارلارعا قاتىستى ۇستاۋ مەرزىمى 60 كۇنگە دەيىن قاراستىرىلعان.

سونداي-اق، ونىڭ ايتۋىنشا، جەرگىلىكتى اتقارۋشى ورگاندار شەشىم قابىلداعان جاعدايدا جانۋارلاردى ۇزاق ۋاقىت ۇستاۋ، جاڭا يەلەرىنە بەرۋ نەمەسە پاناجايلاردا تابيعي ولىمىنە دەيىن كۇتىپ-باعۋ مۇمكىندىگى قاراستىرىلادى.

ءجانبىرشيننىڭ دەرەگىنە سايكەس، سوڭعى ءبىر جىلدا يتتەردىڭ شابۋىلىنان 41 366 ادام زارداپ شەككەن. ونىڭ ىشىندە 23 134 ادام قاڭعىباس يتتەردىڭ كەسىرىنەن زارداپ شەككەنى ايتىلدى.

زاڭ جوباسىندا جەرگىلىكتى اتقارۋشى ورگاندارعا – رەسپۋبليكالىق ماڭىزى بار قالالار، استانا، اۋداندار مەن وبلىستىق ماڭىزى بار قالالار اكىمدىكتەرىنە – جانۋارلاردىڭ اگرەسسياسىن جەدەل تۇردە توقتاتۋ بويىنشا شۇعىل ارەكەت ەتۋ شارالارىن ۇيىمداستىرۋ قۇزىرەتى بەرىلەتىنى كورسەتىلگەن.

ال قاڭعىباس مىسىقتارعا قاتىستى گۋمانيستىك ءتاسىل ساقتالادى. دەپۋتاتتىڭ ايتۋىنشا، حالىقارالىق تاجىريبە مەن تاۋەكەلدەر تالداۋىن ەسكەرە وتىرىپ، ولاردى قايتادان ورتاعا جىبەرۋ مودەلى وزگەرىسسىز قالدىرىلعان.

ماجىلىستە بۇل زاڭ جوباسى قاڭعىباس يتتەردىڭ سانىن ازايتىپ، ادامدارعا جانە باسقا جانۋارلارعا شابۋىل سانىن قىسقارتۋعا مۇمكىندىك بەرەدى دەگەن پىكىر ايتىلدى.

سونىمەن قاتار دەپۋتاتتار جانۋارلارعا قاتىگەزدىك كورسەتكەنى ءۇشىن اكىمشىلىك جانە قىلمىستىق جاۋاپكەرشىلىكتى كۇشەيتۋ ماسەلەسىن دە تالقىلاعان. الايدا بۇل نورمالار اتالعان زاڭ جوباسىنا ەنگىزىلمەگەنى ناقتىلاندى.