Almaty oblysyndaǵy týristik nysandardyń jazǵy maýsymǵa daiyndyǵy tekserildi, dep habarlaidy Dala News.
Jumys saparyna QR Premer-ministriniń orynbasary – mádeniet jáne aqparat ministri Aida Balaeva, týrizm jáne sport ministri Erbol Myrzabosynov, sondai-aq oblys ákimi Marat Sultanǵaziev jáne ortalyq memlekettik organdardyń ókilderi qatysqany aityldy.
Tekserý barysynda Qonaev qalasyndaǵy kommýnaldyq jaǵajailar men «ASP Arena» kesheni qaralǵan. Ákimdik ókilderi sanitariialyq daiyndyq, qaýipsizdik sharalary, meditsinalyq jáne qutqarý qyzmetteriniń jumysy, sondai-aq demalýshylarǵa qolaily jaǵdai jasaý boiynsha atqarylyp jatqan jumystar týraly baiandaǵany habarlandy.
Aida Balaevanyń aitýynsha, nysandardyń tolyq daiyndyǵyn aldyn ala qamtamasyz etý, sýdaǵy qaýipsizdik, azyq-túlik qaýipsizdigi jáne qoǵamdyq tártipti saqtaý basty nazarda bolýy tiis.
Sonymen qatar jaǵajailar men demalys aimaqtarynyń bir bóligi jekemenshik nysandar ekeni atap ótildi. Osyǵan bailanysty vitse-premer olardyń ielerine tazalyqty saqtaý, infraqurylymnyń jai-kúiin baqylaý jáne adamdardyń qaýipsizdigin qamtamasyz etý boiynsha jaýapkershilikti kúsheitý qajettigin aitty.
Oblys ákimdigine demalys aimaqtary ielerine qaýipsizdik, sanitariialyq talaptar jáne qyzmet kórsetý sapasyna qatysty usynymdar ázirleý tapsyryldy.
Sondai-aq týrizm jáne sport ministrligine jekemenshik nysandardyń jaýapkershiligin kúsheitýge baǵyttalǵan quqyqtyq tetikterdi pysyqtaý tapsyrylǵany habarlandy.
Budan bólek, qoǵamdyq tamaqtaný oryndary men servistik nysandardyń qyzmetiniń zańdylyǵyn baqylaý, eńbek zańnamasynyń saqtalýy, qyzmetkerlermen eńbek sharttarynyń bolýy jáne eńbek qaýipsizdigi talaptarynyń oryndalýy tekseriletini aityldy.
Sonymen qatar kólik logistikasy, avtoturaqtardyń jetkiliktiligi jáne jol qozǵalysyn uiymdastyrý máseleleri kóterilgen.
Aida Balaeva «Taza Qazaqstan» qaǵidaty týristik nysandardyń naqty jaǵdaiynan kórinýi tiis ekenin atap ótti.
Jumys saparynyń qorytyndysy boiynsha sanitariialyq jaǵdaidy kúsheitý, qaýipsizdik deńgeiin arttyrý, túsindirý jumystaryn jandandyrý jáne demalys oryndaryna júieli baqylaý ornatý tapsyrylǵany habarlandy.
