«Jomart» kenishinde óndiristik qaýipsizdik sharalary tolyq kólemde oryndalyp, baqylaýǵa alynǵany habarlandy, dep habarlaidy Dala News.
«Qazaqmys korporatsiiasy» JShS basqarma tóraǵasy Rýslan Óskenáli, QR Tótenshe jaǵdailar vitse-ministri Erbolat Sadyrbaev jáne Ónerkásiptik qaýipsizdik komitetiniń tóraǵasy Rashid Dýbaev qatysýymen kenishke jumys sapary uiymdastyrylǵany aityldy.
Sapar barysynda korporatsiia ótken jylǵy oqiǵadan keiin atqarylǵan jumystardyń nátijesin, sondai-aq ónerkásiptik qaýipsizdikti qamtamasyz etýge baǵyttalǵan sharalardyń oryndalý barysyn tanystyrǵany habarlandy. Sonymen qatar kenishtegi aerogazdyq jaǵdai men baqylaý júieleriniń jumysy kórsetilgen.
Málimetke sáikes, mamandandyrylǵan uiymdardyń qatysýymen ǵylymi-zertteý jumystary júrgizilgen. Buǵan deiin oqys oqiǵa tirkelgen aýmaqtarda gazsyzdandyrý sharalary atqarylyp, taý-ken jumystaryn qaýipsiz júrgizý boiynsha jol kartasy ázirlenip, engizilip jatqany aityldy.
Sondai-aq jeldetý júielerin jańǵyrtý jalǵasyp jatqany, táýlik boiy aerogazdyq baqylaý kúsheitilgeni habarlandy.
Korporatsiia qosymsha uiymdastyrýshylyq jáne tehnikalyq sharalardy da iske asyrýda. Atap aitqanda, jabdyqty jańǵyrtý, personaldy pozitsiialaý jáne apattyq habarlaý júielerin damytý, sondai-aq memlekettik inspektorlardyń qatysýymen tekserister júrgizý qarastyrylǵan.
Barlyq jumystar bekitilgen keste boiynsha oryndalyp, turaqty baqylaýǵa alynǵany atap ótildi. Jumyskerlerdiń qaýipsizdigin qamtamasyz etý negizgi basymdyq bolyp qala beretini aityldy.
