Qasym-Jomart Toqaev Koreıa Respýblıkasy Prezıdentiniń arnaýly ókili – Prezıdent Ákimshiliginiń basshysy Kan Hýn Shıkti qabyldady, dep habarlaıdy Dalanews.kz.
Memleket basshysy Koreıa Respýblıkasy Qazaqstannyń negizgi strategıalyq seriktesteriniń biri sanalatynyna nazar aýdaryp, ekijaqty yqpaldastyq qarqynyna joǵary baǵa berdi.
Prezıdent Qazaqstannyń koreı halqyna jáne Koreıa Respýblıkasynyń damý deńgeıine qurmetpen qaraıtynyn atap ótip, Astana eki el arasyndaǵy keńeıtilgen strategıalyq seriktestikti odan ári nyǵaıtýǵa nıetti ekenin rastady.
Qasym-Jomart Toqaev Kan Hýn Shıktiń arnaýly ókil retinde elimizge jasaǵan saparynyń mańyzdylyǵyna toqtaldy jáne Koreıa Respýblıkasynyń Prezıdenti Lı Chje Móńge ystyq lebizin joldady.
– Sizdiń saparyńyz qazaq-koreı yqpaldastyǵyn odan ári nyǵaıtý turǵysynan óte mańyzdy. Birlesken kúsh-jigerdiń arqasynda elderimizdiń yntymaqtastyǵy arta túsetinine senimdimin, – dedi Memleket basshysy.
Kan Hýn Shık qonaqjaılyq tanytqany úshin rızashylyq bildirip, Qazaqstannyń jańa Konstıtýsıasyn qabyldaý boıynsha referendýmnyń tabysty ótýine oraı Prezıdent Lı Chje Móńniń quttyqtaýyn jetkizdi.
Arnaýly ókil Koreıa Respýblıkasynyń saýda-ekonomıkalyq jáne ınvestısıalyq baılanystardy kúsheıtý, sondaı-aq túrli salada birlesken jobalardy iske asyrý arqyly ózara qarym-qatynasty múldem jańa deńgeıge shyǵarýǵa aıryqsha mańyz artatynyn málimdedi.
Áńgimelesý barysynda ekijaqty kún tártibindegi kóptegen másele, sonyń ishinde jahandyq naryqtaǵy qazirgi syn-qaterlerge baılanysty energetıka, kólik-logıstıka salalarynda yqpaldastyq aıasyn keńeıtý perspektıvasy talqylandy.
Kezdesý sońynda Kan Hýn Shık Prezıdent Lı Chje Móńniń Qazaqstan Prezıdentin Koreıa Respýblıkasyna saparmen kelýge jáne bıyl qyrkúıek aıynda Seýlde ótetin «Ortalyq Azıa – Koreıa Respýblıkasy» samıtine qatysýǵa shaqyratynyn aıtty.
Qasym-Jomart Toqaev Ońtústik Koreıa kóshbasshysynyń shaqyrýyn yqylaspen qabyl aldy. Memleket basshysy joǵary deńgeıde ótetin aldaǵy kelissózder eki el yntymaqtastyǵyn jandandyryp, Ortalyq Azıa – Koreıa Respýblıkasy formatyndaǵy yqpaldastyqty arttyrýǵa oń septigin tıgizetinine senim bildirdi.
