«Energetikalyq jáne kommýnaldyq sektorlardy jańǵyrtý» jónindegi ulttyq jobanyń Jobalyq keńse otyrysynda 2026 jylǵa arnalǵan jospar-kesteden artta qalyp kele jatqan Qazaqstannyń óńirleri ataldy, dep habarlaidy Dalanews.kz
Jylýmen jabdyqtaý salasynda Mańǵystaý oblysy antireitingtiń absoliýtti kóshbasshysy atandy – munda buǵan deiin 47 km jeli salý josparlanǵan edi. Sáýir aiynyń basyndaǵy jaǵdai boiynsha jospardyń oryndalý kórsetkishi 0%. SQO-da 22 shaqyrymnyń 2-eýi ǵana tapsyryldy (jospar-keste 9%-ǵa oryndaldy). ShQO-da bekitilgen 39 km-diń 8-in ǵana salyp, jospar-kesteni 20% ǵana oryndady. Úzdik altylyqqa (top-6) Jambyl oblysy (17 km-diń 3 km-i, jospar 21%-ǵa oryndaldy), Almaty oblysy (5 km-diń 2 km-i, jospar 32%-ǵa oryndaldy) jáne Abai oblysy (14 km-diń 5 km-i, jospar 32%-ǵa oryndaldy) kirdi.
Elektrmen jabdyqtaý salasynda Abai oblysy artta qalýshylar tiziminiń kósh basynda tur: 422 shaqyrym josparlansa da, oryndalý kórsetkishi 0%. Soltústik Qazaqstan oblysynda 1 636 km-diń 62 km-i tartyldy – kesteniń oryndalýy 4%. Antireitingtiń úshinshi satysynda Qyzylorda oblysy tur – 373 shaqyrymnyń 67 shaqyrymy nemese 18%-y oryndaldy. Úzdik altylyqqa Qaraǵandy oblysy (947 km-diń 204 km-i, jospardyń 22%-y), Pavlodar oblysy (486 km-diń 147 km-i, 30%) jáne Batys Qazaqstan oblysy (4 176 km-diń 1 753 km-i, 42%) endi.
Sýmen jabdyqtaý salasynda antireitingti Qyzylorda oblysy bastap tur. Munda is-sharalar jospary boiynsha bekitilgen 22 km jeliniń 1 km-i ǵana tartylǵan (oryndalýy 3%). Odan keiin 69 km-diń 5 km-in oryndaǵan Pavlodar oblysy ornalasqan (oryndalýy 7%). Antiliderler úshtigin 44 km-diń 6 km-in oryndaǵan Astana qalasy túiindeidi (oryndalýy 13%). Shymkentte (109 km-diń 23 km-i, 21%), BQO-da (34 km-diń 8 km-i, 23%) jáne Almatyda (145 km-diń 37 km-i, 25%) jaǵdai sál ǵana jaqsyraq.
Sý burý salasynda is-sharalar josparynyń oryndalýy boiynsha Batys Qazaqstan oblysyndaǵy jaǵdai eń nashar bolyp tur – josparlanǵan 21 km-diń eshbiri de oryndalmaǵan, sáikesinshe 0% kórsetkishpen óńir «kósh bastap» tur. Mańǵystaý oblysynda jaǵdai sál ǵana jaqsyraq: josparlanǵan 29 km-diń 0 km-i oryndalsa da, jospardyń oryndalýy 1%-dy qurady. Astanada josparlanǵan 29 km-diń tutas bir kilometri sátti aiaqtalyp, jospar birden 3%-ǵa oryndaldy. Sondai-aq Aqmola oblysy (48 km-diń 5 km-i, 9%), Abai oblysy (38 km-diń 4 km-i, 10%) jáne Soltústik Qazaqstan oblysy (20 km-diń 3 km-i, 13%) josparlardy iske asyrýǵa asyǵar emes.
Esterińizge sala keteiik, 3 sáýirde ótken jobalyq keńse otyrysynda QR Premer-ministriniń orynbasary Qanat Bozýmbaev 2027 jylǵa qarai ákimdikter turǵyn úi-kommýnaldyq sharýashylyq salasyndaǵy «qyzyl aimaqty» tolyǵymen joiýy tiis ekenin atap ótti. Ýaqytyly oryndalmaǵan jáne sapasyz oryndalǵan jaǵdaida derbes jaýapkershilik sharalary qoldanylady.
Anyqtama: «Energetikalyq jáne kommýnaldyq sektorlardy jańǵyrtý» ulttyq jobasy respýblika boiynsha 2029 jylǵa deiin iske asyrylylady. Joba kommýnaldyq infraqurylymnyń tozýyn 40%-ǵa deiin tómendetýge jáne apat qaýpin 20%-ǵa qysqartýǵa baǵyttalǵan.
