«ەنەرگەتيكالىق جانە كوممۋنالدىق سەكتورلاردى جاڭعىرتۋ» جونىندەگى ۇلتتىق جوبانىڭ جوبالىق كەڭسە وتىرىسىندا 2026 جىلعا ارنالعان جوسپار-كەستەدەن ارتتا قالىپ كەلە جاتقان قازاقستاننىڭ وڭىرلەرى اتالدى، دەپ حابارلايدى Dalanews.kz
جىلۋمەن جابدىقتاۋ سالاسىندا ماڭعىستاۋ وبلىسى انتيرەيتينگتىڭ ءابسوليۋتتى كوشباسشىسى اتاندى – مۇندا بۇعان دەيىن 47 كم جەلى سالۋ جوسپارلانعان ەدى. ءساۋىر ايىنىڭ باسىنداعى جاعداي بويىنشا جوسپاردىڭ ورىندالۋ كورسەتكىشى 0%. سقو-دا 22 شاقىرىمنىڭ 2-ەۋى عانا تاپسىرىلدى (جوسپار-كەستە 9%-عا ورىندالدى). شقو-دا بەكىتىلگەن 39 كم-دىڭ 8ء-ىن عانا سالىپ، جوسپار-كەستەنى 20% عانا ورىندادى. ۇزدىك التىلىققا (توپ-6) جامبىل وبلىسى (17 كم-دىڭ 3 كم-ى، جوسپار 21%-عا ورىندالدى)، الماتى وبلىسى (5 كم-دىڭ 2 كم-ى، جوسپار 32%-عا ورىندالدى) جانە اباي وبلىسى (14 كم-دىڭ 5 كم-ى، جوسپار 32%-عا ورىندالدى) كىردى.
ەلەكترمەن جابدىقتاۋ سالاسىندا اباي وبلىسى ارتتا قالۋشىلار ءتىزىمىنىڭ كوش باسىندا تۇر: 422 شاقىرىم جوسپارلانسا دا، ورىندالۋ كورسەتكىشى 0%. سولتۇستىك قازاقستان وبلىسىندا 1 636 كم-دىڭ 62 كم-ى تارتىلدى – كەستەنىڭ ورىندالۋى 4%. انتيرەيتينگتىڭ ءۇشىنشى ساتىسىندا قىزىلوردا وبلىسى تۇر – 373 شاقىرىمنىڭ 67 شاقىرىمى نەمەسە 18%-ى ورىندالدى. ۇزدىك التىلىققا قاراعاندى وبلىسى (947 كم-دىڭ 204 كم-ى، جوسپاردىڭ 22%-ى)، پاۆلودار وبلىسى (486 كم-دىڭ 147 كم-ى، 30%) جانە باتىس قازاقستان وبلىسى (4 176 كم-دىڭ 1 753 كم-ى، 42%) ەندى.
سۋمەن جابدىقتاۋ سالاسىندا انتيرەيتينگتى قىزىلوردا وبلىسى باستاپ تۇر. مۇندا ءىس-شارالار جوسپارى بويىنشا بەكىتىلگەن 22 كم جەلىنىڭ 1 كم-ى عانا تارتىلعان (ورىندالۋى 3%). ودان كەيىن 69 كم-دىڭ 5 كم-ىن ورىنداعان پاۆلودار وبلىسى ورنالاسقان (ورىندالۋى 7%). انتيليدەرلەر ۇشتىگىن 44 كم-دىڭ 6 كم-ىن ورىنداعان استانا قالاسى تۇيىندەيدى (ورىندالۋى 13%). شىمكەنتتە (109 كم-دىڭ 23 كم-ى، 21%)، بقو-دا (34 كم-دىڭ 8 كم-ى، 23%) جانە الماتىدا (145 كم-دىڭ 37 كم-ى، 25%) جاعداي ءسال عانا جاقسىراق.
سۋ بۇرۋ سالاسىندا ءىس-شارالار جوسپارىنىڭ ورىندالۋى بويىنشا باتىس قازاقستان وبلىسىنداعى جاعداي ەڭ ناشار بولىپ تۇر – جوسپارلانعان 21 كم-دىڭ ەشبىرى دە ورىندالماعان، سايكەسىنشە 0% كورسەتكىشپەن ءوڭىر «كوش باستاپ» تۇر. ماڭعىستاۋ وبلىسىندا جاعداي ءسال عانا جاقسىراق: جوسپارلانعان 29 كم-دىڭ 0 كم-ى ورىندالسا دا، جوسپاردىڭ ورىندالۋى 1%-دى قۇرادى. استانادا جوسپارلانعان 29 كم-دىڭ تۇتاس ءبىر كيلومەترى ءساتتى اياقتالىپ، جوسپار بىردەن 3%-عا ورىندالدى. سونداي-اق اقمولا وبلىسى (48 كم-دىڭ 5 كم-ى، 9%)، اباي وبلىسى (38 كم-دىڭ 4 كم-ى، 10%) جانە سولتۇستىك قازاقستان وبلىسى (20 كم-دىڭ 3 كم-ى، 13%) جوسپارلاردى ىسكە اسىرۋعا اسىعار ەمەس.
ەستەرىڭىزگە سالا كەتەيىك، 3 ساۋىردە وتكەن جوبالىق كەڭسە وتىرىسىندا ق ر پرەمەر-مينيسترىنىڭ ورىنباسارى قانات بوزۋمبايەۆ 2027 جىلعا قاراي اكىمدىكتەر تۇرعىن ۇي-كوممۋنالدىق شارۋاشىلىق سالاسىنداعى «قىزىل ايماقتى» تولىعىمەن جويۋى ءتيىس ەكەنىن اتاپ ءوتتى. ۋاقىتىلى ورىندالماعان جانە ساپاسىز ورىندالعان جاعدايدا دەربەس جاۋاپكەرشىلىك شارالارى قولدانىلادى.
انىقتاما: «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى رەسپۋبليكا بويىنشا 2029 جىلعا دەيىن ىسكە اسىرىلىلادى. جوبا كوممۋنالدىق ينفراقۇرىلىمنىڭ توزۋىن 40%-عا دەيىن تومەندەتۋگە جانە اپات ءقاۋپىن 20%-عا قىسقارتۋعا باعىتتالعان.
