Kreml Ýkraınanyń Eýroodaqqa kirýine qatysty pikir bildirdi, dep habarlaıdy Dalanews.kz RBK-ǵa silteme jasap.
Ýkraınanyń Eýroodaqqa kirýi - eldiń egemendik quqyǵy, bul ekonomıkalyq ıntegrasıa máselesi, sondyqtan eshkim Kıevke shart qoıa almaıdy.
Reseı prezıdentiniń baspasóz hatshysy Dmıtrıı Peskov osylaı dep málimdedi. Onyń aıtýynsha, bul - kez kelgen eldiń derbes tańdaýy, al ekonomıkalyq ıntegrasıaǵa qatysty prosesterde eshbir memleket basqa bir elge talap qoıa almaıdy.
«Bul - kez kelgen eldiń egemendik quqyǵy. Áńgime ıntegrasıalyq, ekonomıkalyq prosester týraly bolyp otyr, munda eshkim eshteńe eshkimge dıktat jasaı almaıdy. Biz buǵan múlde talpynbaımyz», - dedi Peskov TASS agenttigine bergen suhbatynda.
Alaıda Máskeý áskerı alánstarǵa qatysty múlde basqa ustanymda ekenin erekshe atap ótti.
«Bul - múlde basqa másele, ony bári jaqsy biledi», - dedi ol.
Reseı Ýkraına men NATO arasyndaǵy yqtımal odaqtastyqqa úzildi-kesildi qarsy. Máskeý bul bloktyń keńeıýin óziniń ulttyq qaýipsizdigine tikeleı qaýip dep sanaıdy. Reseı prezıdenti Vladımır Pýtın Ýkraınanyń NATO-ǵa qosylýy kenetten jasalatyn soqqy qaýpin birneshe ese arttyrady dep málimdegen. Sondyqtan Kıevtiń áskerı blokqa kirýden bas tartýyn Pýtın beıbit kelissózderdi bastaý sharttarynyń biri retinde ataǵan edi.
Esterińizge sala keteıik, Ýkraına 2022 jyldyń kúzine qaraı NATO-ǵa jedeldetilgen tártipte kirý týraly ótinish bergen bolatyn. Sol ýaqyttan beri aláns Ýkraınamen yntymaqtastyqty kúsheıtý nıeti týraly birneshe ret málimdegenimen, eldiń múshelikke daıyn emestigin jáne belgili bir sharttardyń oryndalýy qajettigin alǵa tartyp keledi.
