Almatyda 2025 jyly 4 aqpanda kóshe saýdasy nysandaryn joiý naýqany bastaldy. Jumys Almaty qalasynyń ákimi Erbolat Dosaevtyń tapsyrmasy boiynsha qolǵa alynǵan,- dep habarlaidy Dalanews.kz
Qazirgi tańda memlekettik qor jerlerinde ornalasqan 302 zańsyz saýda nysany jáne 222 oiyn apparaty (kúsh ólshegishter) súrildi. Qalǵan 210 zańsyz saýda nysany 15 naýryzǵa deiin alynady.
Bul jumysty qala turǵyndary da baǵalap úlgerdi. Almatynyń Medeý aýdanynda turatyn Tatiana Kasatkina dúńgirshekterdiń alynýymen kósheler keńeiip, tazaryp, jaiaý júrginshilerge oryn kóbeigenin atap ótti.
"Dostyq dańǵyly boiyndaǵy, sonyń ishinde «Dostyq Plaza» saýda ortalyǵynyń janyndaǵy, sondai-aq, "Orbita" shaǵyn aýdanyndaǵy dúńgirshekterdiń aqyry alynǵanyna óte qýanyshtymyz. Buryn fastfýd dúńgirshekterinen qalǵan qoqystar, aryqtarda júgirip júrgen egeýquiryqtar kóz aldymyzda bolatyn. Bizdiń halyq áli de tamaqtaný mádenietin, ózinen keiin tazalyq saqtaýdy úirenýi kerek. Jegen tamaǵynyń qoqysyn jerge, asfaltqa laqtyra salady. Al dúńgirshekterdiń janyndaǵy qoqys jáshikteri jii tolyp turatyn. Jalpy, asyǵyp jegen fastfýdtyń paidaly ekenine de kúmán bar. Bul dúńgirshekterdiń qyzmetkerleri men ondaǵy sanitarlyq jaǵdaiyna da suraq kóp. Oǵan qosa, Medeý aýdanyn týrister jii aralaityndyqtan, qalanyń kelbeti de mańyzdy. Kóktemge qarai qalamyz tazaryp, óziniń ádemiligi men jailylyǵyn kórsete tússe eken", – dedi Tatiana Kasatkina.
Áýezov aýdanynyń turǵyny Aigúl Kúljahanova dúńgirshekter alynǵannan keiin balalar alańyna qoljetimdilik artqanyn, ainalanyń tazara túskenin aitty.
"Bul másele aýdanda tórt jyldan beri sheshimin tappai keldi. Aldymen Fýrkat kóshesinde eki dúńgirshek paida boldy, keiin taǵy ekeýi qosyldy. Birinshiden, olar jaqynda ǵana salynǵan vorkaýt aimaǵy, skeit alańy jáne balalar alańynyń aldyn jaýyp tastady. Ekinshiden, jumys istegen oryndary antisanitarlyq jaǵdaida boldy: ydystaryn dúńgirshektiń artynda, qarapaiym legende jýdy, ainalasyna oraýysh qaǵazdar, paketter men tamaq qaldyqtary shashylyp jatatyn. Sondai-aq, bul dúńgirshekterdiń janynda jergilikti kolledj stýdentteri, mektep oqýshylary men ózge de adamdar jinalyp, mektep aýmaǵyna kirýge kedergi keltiretin. Odan bólek, olar gúlzardyń ornynda bolyp, gúlder kórinbei qaldy. Men bul máseleni «e-Otinish» arqyly eki ret ótinish jazdym. Bilik nazar aýdarǵanyna qýanyshtymyn. Jaqynda barlyq tórt dúńgirshek alynyp tastalyp, aýmaq tazartyldy, endi balalar alańyna emin-erkin kirýge bolady. Kóktemde qaitadan gúlzar jasalady dep úmittenemin", – dedi ol.
Óz oiyn Almaty qalasynyń turǵyny Zarina Zýnaeva da bildirdi.
"Kóktem jaqyndaǵanda qalamyz jańaryp jatqany jaqsy. Kósheler keńeiip, tazaryp keledi, tártip kúsheidi. Biznesti zań aiasynda júrgizý kerek, bul elimizdegi barsha azamat úshin ortaq talap. Bizdi burynnan alańdatqan másele – dúńgirshekterden qalǵan qoqys, sanitarlyq normalardyń saqtalmaýy, kósheler men jaiaý júrginshiler jolynyń tarylýy siiaqty máselege nazar aýdarylǵanyna rizamyz. Bul jumystyń jalǵasatynyna úmittenemiz", – dedi Zarina Zýnaeva.
