Májilis depýtatattary turǵyn úi-kommýnaldyq sharýashylyq máselelerine qatysty zań jobasyn maquldady. Oǵan sáikes, kommýnaldyq tarifterdi endi AEK-ke (ailyq eseptik kórsetkishke) bailaý kózdelgen. Depýtat Ekaterina Smyshliaeva osyndaida tólem aitarlyqtai óse qoimaidy dep sendirdi, dep habarlaidy Dalanews.kz.
Onyń aitýynsha, TKSh máseleleri jónindegi zań jobasyna turǵyndardan alynatyn eki salymnyń túri aiqyndalǵan: maqsatty jáne jinaq túrindegi jarnalar.
"Búginderi tarifterdi máslihattar bekitedi. Alaida máslihattar bul qadamǵa barýǵa qulyqsyz, óitkeni tarifti kóterse, sailaýshylar attandap shyǵady. Sondyqtan máslihattar birneshe jyl boiy ony kótermei kelgen, al tómen tariftermen úide kútip-baptap ustaý kúnnen kúnge qiyndap barady. Biz basqarýdan bólek turǵyn úi qoryn saqtaý qory baryn da bilemiz", - dedi depýtat.
Ol osy sebepti zań jobasynda tarifti AEK-ke bailaý týrasy qyzý talqylanǵanyn, sondyqtan ol avtomatty túrde indeksteletinin jáne máslihattar bul máselege endi bas aýyrta bermeitinin atap ótti.
Depýtattyń aitýynsha, qazir turǵyn úilerge qyzmet kórsetý tarifteri tómen jáne ony máslihattar bekitedi: bir jerde ol 50 teńge, 52 teńge nemese 57 teńge.
"Ideia boiynsha tarifter jyl saiyn qaita qaralyp otyrýy tiis, óitkeni turǵyn úi qoryn ustaý mańyzdy mindet bolyp tabylady. Eger eń tómengi tarif qaita qaralmasa, onyń ósimi jalpy daýys berý arqyly qarastyrylýy tiis jáne mindetti túrde turǵyndarmen jinalysta ózara kelisilýi kerek. Tiisinshe, tarifterdi eshkim óz erkimen kótere almaidy. Ekinshi jaǵynan, basqarýshy kompaniialar tarifterdi kúrt kóterýi múmkin. Bizdiń oiymyzsha, tarif AEK-ke bailansa, kúrt ósim bolmaidy, óitkeni AEK birkelki ósedi. Tiisinshe, tarif birneshe teńgege ǵana ulǵaiady, bul qazaqstandyqtardyń biýdjetine aýyr soqqy bolmaidy. Mundai esepteý tetigi halyqtyń qaltasyna salmaq salmai, turǵyn úidi kútip-baptap ustaýǵa qajetti qarajatty jinaýǵa múmkindik beredi", – dedi Smyshliaeva.
Aita ketsek, ásirese Almaty turǵyndary kommýnaldyq tarifter ósimine qatty boi uryp otyr. Bir jyldaǵy ósim, ásirese jaily turǵyn úilerde 100 paiyzdy qamtyǵan.
