Qarjy vitse-ministri Erjan Birjanov qazaqstandyq blogerlerdiń salyq salýyna qatysty jańa málimetterdi bólisti, dep habarlaidy Dalanews.kz.
Birjanovtyń aitýynsha, Qazaqstanda 50-den astam bloger salyq tólegen.
“Búgingi tańda 50-den astam bloger 2,5 milliard teńgeden astam kirisin kórsetip, olar boiynsha salyq tólendi”, – dedi Birjanov Májilis kýlýarynda.
Vitse-ministr naqty aqparatty aidyń sońyna deiin jariialaýǵa ýáde berdi.
“Áli ýaqyt bar. 30 jumys kúni berildi. Naýryzdyń sońyna deiin salystyryp, málimetterdi usynamyz”, – dep tolyqtyrdy Birjanov.
Eske salaiyq, buǵan deiin qazaqstandyq 8 bloger óz erkimen 1 mlrd teńgeden astam tabysyn deklaratsiialaǵan bolatyn.
Kirister komitetiniń málimetinshe, atalǵan blogerlerdiń biýdjetke tólegen jalpy salyǵy 70 million teńgeden asady. Degenmen salyq organdary olardyń aty-jónin jariia etpeitinin jáne jeke derekterdi taratpaitynyn málimdedi.
Bul rette Ishki ister ministrligi (IIM) áleýmettik jelide taraǵan blogerler tiziminiń ras-ótirigine qatysty óz ustanymyn bildirdi.
IIM málimetinshe, boryshker blogerler týraly aqparattyń taralý deregi tirkelip, is Astana qalasynyń politsiia departamentine jiberilgen.
"Áleýmettik jelilerde blogerler týraly derekteri bar tizimdi taratý faktisi Ishki ister ministrliginiń aqparatty esepke alý kitabyna tirkeldi. Materialdy qaraý barysynda bul tizimniń shynaiylyǵy tekseriledi", – delingen vedomstvo habarlamasynda.
Eske salaiyq, buǵan deiin salyq tólemei kelgen blogergerge qatysty aqparat taraǵan edi. Qazaqstandyq blogerlerge qatysty salyqtyq tekserýlerdiń ne sebepti bastalǵanyn Memlekettik kirister komiteti (MKK) túsindirdi.MKK jeke tulǵalardyń kiristerin ákimshilendirý basqarmasynyń basshysy Dina Qusaiynovanyń TengriTV YouTube arnasyna bergen suhbatynda aitýynsha, salyq organdaryna qazaqstandyqtardan birneshe shaǵym túsken.
