Álemniń eń aýqatty adamdary bir kúnde milliardtaryn joǵaltty. Bul oqiǵa jai ǵana sandar oiyny emes, qarjy naryǵynyń bulqynysy, saiasi sahnadaǵy oiyndardyń áseri ekeni anyq. Bloomberg derekterine nazar aýdarsaq, Ilon Mask 148 milliard, Djeff Bezos 29 milliard, Sergei Brin 22 milliard, Mark Tsýkerberg pen Bernar Arno 5 milliard dollarynan aiyrylǵan. Bul naryqtaǵy turaqsyzdyq pen saiasi belgisizdik sebep bolǵan.
Tramptyń AQSh ekonomikasyna engizip jatqan ózgeristeri investorlardy ábigerge salýda. Ásirese, onyń Ýkrainaǵa kómek berý máselesin qaita qaraýy, ekonomikalyq strategiiasynda kútpegen qadamdarǵa barýy naryqtyń júikesine tiip, aktsiialardyń qunyn tómendetti.
Osylaisha Amerika naryǵy Ýkrainaǵa bergen kómeginen on ese kóp qarjyny joǵaltty. Bul – saiasat pen ekonomikanyń qarama-qaishy áserleriniń anyq kórinisi. Búginde zamanda baqýatty adamdar úshin aqshanyń ózi ǵana emes, onyń senimdiligi mańyzdy. Eger naryqtaǵy belgisizdik ósse, investorlar táýekelden qashady, al táýekelden qashqan ortada kapitaldyń quny kúrt tómendeitini beligi.
Qazirgi zamanda tehnologiialyq sektor naryqtyń basty qozǵaltqyshyna ainalǵany belgili. Mask, Bezos, Brin, Tsýkerberg syndy milliarderlerdiń bailyǵy tikelei osy sektorǵa bailanysty. Biraq sońǵy ailarda dál osy indýstriiada aitarlyqtai quldyraýdy bastan ótkerdi.
Tesla aktsiialary 45%-ǵa tómendedi, al Amazon, Oracle shamamen 11%-ǵa, Dell men Nvidia 20%-dan astamǵa quldyraǵan. Buryn senimdi bolyp kóringen tehnologiialyq alpaýyttar qazir naryqtaǵy turaqsyzdyqtyń epitsentrine ainalyp otyr. Investorlar joǵary baǵalanǵan tehnologiialyq kompaniialardyń aktsiialaryn jappai sata bastaǵan. Bul úrdis jalǵasa berse, aldaǵy ýaqytta tehnologiialyq salada úlken ózgerister bolýy múmkin.
Qarjy naryǵy árdaiym ózine tán dinamikamen damidy. Uzaq ýaqyt boiy ósimde bolǵan aktivter belgili bir kezeńde quldyraýǵa ushyraidy. Bul zańdy qubylys. Biraq osy jolǵy quldyraý erekshe aýqymdy boldy. Oǵan basty sebep – infliatsiianyń qaita kúsheiý qaýpi men AQSh ekonomikasynyń turaqsyzdyǵy.
Tramptyń saiasi ustanymy biznes qaýymdastyǵy úshin tym boljap bolmaityn sipatqa ie. Onyń málimdemeleri men qadamdary naryqtyń senimin shaiqaltyp, milliarderlerdiń bailyǵynyń qunyn tómendetip jatyr. Eger saiasi turaqsyzdyq pen ekonomikalyq belgisizdik jalǵasa berse, mundai shyǵyndar tek tehnologiialyq sektorǵa ǵana emes, búkil jahandyq qarjy júiesine áser etýi múmkin.
Aqsha tek sandar ǵana emes, ol – bilik, ol – yqpal. Milliarderlerdiń bailyǵy azaiǵan saiyn, olardyń naryqtaǵy orny da ózgeredi. Bul jaǵdai naryqtyq oiynshylar úshin úlken sabaq bolýy múmkin. Kezinde ózgermeitindei kóringen qarjylyq alyptar endi ózderiniń pozitsiiasyn qaita baǵalaýǵa májbúr. Bul tek basy ǵana bolýy múmkin.
