QR QM Memlekettik kirister komiteti jalpyǵa birdei belgilengen salyq salý rejiminde jumys isteitin jáne jeke kásipkerlermen ózara esep aiyrysý arqyly salyqtyq mindettemelerin ońtailandyratyn salyq tóleýshilerdi ákimshilendirýdi jalǵastyrýda, dep habarlaidy Dalanews.kz.
Taldaý qorytyndysy boiynsha 633 salyq tóleýshige, onyń ishinde 172 qurylys salasynda (iri qurylys kompaniialaryn qosa alǵanda), 102 saýda jáne basqa da qyzmet túrlerimen ainalysatyn kompaniialarǵa salyq salynatyn kiristerin tómendetý belgileri boiynsha habarlamalar jiberildi.
12 naýryzdaǵy jaǵdai boiynsha salyq tóleýshiler qosymsha eseptilik nysandaryn tapsyryp, salyqtaryn tolyqtyrýda. Qazirgi tańda 17 mlrd teńge tólendi, onyń ishinde BI Group jáne BAZIS kompaniialary da óz tólemderin júzege asyrdy.
Derekterdi salystyrý jumystary jalǵasýda.
Memlekettik kirister komiteti premer-ministr Oljas Bektenovtiń eskertýinen keiin «Bazis-A» jáne «Bi Group» qansha somada salyq kirisin tómendetip kórsetkeni jóninde aqparat bergen bolatyn.
Qansha salyq bereshek?
Memlekettik kirister organdary «Bazis-A» kompaniiasyna 4,6 mlrd teńge, «Bi Group» kompaniiasyna 11,9 mlrd teńge mólsherinde salyqqa jatatyn kiris tómendetip kórsetilgeni jóninde habarlama jibergen.
"Bul jumys 2022-2023 jyldar aralyǵynda arnaiy salyq rejimderin (ASR) qoldanatyn sýbektiler men jalpyǵa birdei belgilengen tártipte jumys isteitin kompaniialar arasyndaǵy ózara esep aiyrysýlardy taldaý sheńberinde júrgizilgen. Taldaý nátijesinde bul kompaniialardyń ASR-dy salyqtyq tólemderin azaitý maqsatynda paidalanǵany anyqtalǵan. Kameraldyq baqylaý rásimi salyq tóleýshilerge tekseris júrgizbei-aq óz kiristerin túzetip, salyqtaryn tóleýge múmkindik beretinin túsindiremiz", - dep eskertti salyq organdary.
"Sońy qiyn bolady". Úkimet basshysy Bektenovtiń eskertýi
28 aqpanda premer-ministr Oljas Bektenov vitse-premer-ulttyq ekonomika ministri Serik Jumanǵarinmen jáne qarjy ministri Mádi Takievpen birge jumys keńesin ótkizdi. Keńeste salyq-biýdjet reformasy jáne salyq túsimderin baqylaýdy kúsheitý máseleleri qaraldy.
Qarjy ministri Mádi Takiev júrgizilgen taldaý sheńberinde salyq tóleýshiler shaǵyn kásipkerlikti qoldaý jáne damytý maqsatynda buryn engizilgen arnaiy salyq rejimderin (SRP) paidalanǵany anyqtalǵanyn baiandady.
"Qarjy ministriniń aqparatynan salyq júktemesin ońtailandyrýdyń ártúrli shemalaryn qoldana otyryp, mindetin adal atqarmaityn kásipkerler baryn kórip otyrmyz. Milliardtaǵan ainalymmen olar biýdjetke ózderiniń tapqan paidasyna múldem sáikes kelmeitin somalardy tóleidi. Bizde osyndai iri kompaniialardyń tolyq tizimi bar. Ol tizimde BI Group, BAZIS jáne basqa da kóptegen iri qurylys kompaniiasy júr. Ekonomikanyń basqa salalarynda jumys isteitin belgili ári tanymal meiramhanalar, fitnes-klýbtar jáne ártúrli kompaniialar bar. Osy múmkindikti paidalana otyryp, qazir salyq júktemesin ońtailandyrýdyń túrli shemalaryn qoldanatyn iri kompaniialardyń ieleri men basshylaryna qarata aitqym keledi. Búgin-erteń sizderdiń kompaniialaryńyzǵa salyq organdarynan qosymsha salyq somalaryn tóleý qajettiligi týraly habarlamalar kelip túsedi", - dedi Bektenov.
Oljas Bektenov kásipkerlerden eki apta ishinde salyq organdaryna qosymsha salyq deklaratsiialaryn tapsyrýdy jáne shynaiy salyq somasyn tóleýdi surady.
