ق ر قم مەملەكەتتىك كىرىستەر كوميتەتى جالپىعا بىردەي بەلگىلەنگەن سالىق سالۋ رەجيمىندە جۇمىس ىستەيتىن جانە جەكە كاسىپكەرلەرمەن ءوزارا ەسەپ ايىرىسۋ ارقىلى سالىقتىق مىندەتتەمەلەرىن وڭتايلاندىراتىن سالىق تولەۋشىلەردى اكىمشىلەندىرۋدى جالعاستىرۋدا، دەپ حابارلايدى Dalanews.kz.
تالداۋ قورىتىندىسى بويىنشا 633 سالىق تولەۋشىگە، ونىڭ ىشىندە 172 قۇرىلىس سالاسىندا (ءىرى قۇرىلىس كومپانيالارىن قوسا العاندا)، 102 ساۋدا جانە باسقا دا قىزمەت تۇرلەرىمەن اينالىساتىن كومپانيالارعا سالىق سالىناتىن كىرىستەرىن تومەندەتۋ بەلگىلەرى بويىنشا حابارلامالار جىبەرىلدى.
12 ناۋرىزداعى جاعداي بويىنشا سالىق تولەۋشىلەر قوسىمشا ەسەپتىلىك نىساندارىن تاپسىرىپ، سالىقتارىن تولىقتىرۋدا. قازىرگى تاڭدا 17 ملرد تەڭگە تولەندى، ونىڭ ىشىندە BI Group جانە BAZIS كومپانيالارى دا ءوز تولەمدەرىن جۇزەگە اسىردى.
دەرەكتەردى سالىستىرۋ جۇمىستارى جالعاسۋدا.
مەملەكەتتىك كىرىستەر كوميتەتى پرەمەر-مينيستر ولجاس بەكتەنوۆتىڭ ەسكەرتۋىنەن كەيىن «Bazis-A» جانە «Bi Group» قانشا سومادا سالىق كىرىسىن تومەندەتىپ كورسەتكەنى جونىندە اقپارات بەرگەن بولاتىن.
قانشا سالىق بەرەشەك؟
مەملەكەتتىك كىرىستەر ورگاندارى «Bazis-A» كومپانياسىنا 4،6 ملرد تەڭگە، «Bi Group» كومپانياسىنا 11،9 ملرد تەڭگە مولشەرىندە سالىققا جاتاتىن كىرىس تومەندەتىپ كورسەتىلگەنى جونىندە حابارلاما جىبەرگەن.
"بۇل جۇمىس 2022-2023 جىلدار ارالىعىندا ارنايى سالىق رەجيمدەرىن (اسر) قولداناتىن سۋبەكتىلەر مەن جالپىعا بىردەي بەلگىلەنگەن تارتىپتە جۇمىس ىستەيتىن كومپانيالار اراسىنداعى ءوزارا ەسەپ ايىرىسۋلاردى تالداۋ شەڭبەرىندە جۇرگىزىلگەن. تالداۋ ناتيجەسىندە بۇل كومپانيالاردىڭ اسر-دى سالىقتىق تولەمدەرىن ازايتۋ ماقساتىندا پايدالانعانى انىقتالعان. كامەرالدىق باقىلاۋ ءراسىمى سالىق تولەۋشىلەرگە تەكسەرىس جۇرگىزبەي-اق ءوز كىرىستەرىن تۇزەتىپ، سالىقتارىن تولەۋگە مۇمكىندىك بەرەتىنىن تۇسىندىرەمىز"، - دەپ ەسكەرتتى سالىق ورگاندارى.
"سوڭى قيىن بولادى". ۇكىمەت باسشىسى بەكتەنوۆتىڭ ەسكەرتۋى
28 اقپاندا پرەمەر-مينيستر ولجاس بەكتەنوۆ ۆيسە-پرەمەر-ۇلتتىق ەكونوميكا ءمينيسترى سەرىك جۇمانعارينمەن جانە قارجى ءمينيسترى ءمادي تاكييەۆپەن بىرگە جۇمىس كەڭەسىن وتكىزدى. كەڭەستە سالىق-بيۋدجەت رەفورماسى جانە سالىق تۇسىمدەرىن باقىلاۋدى كۇشەيتۋ ماسەلەلەرى قارالدى.
قارجى ءمينيسترى ءمادي تاكييەۆ جۇرگىزىلگەن تالداۋ شەڭبەرىندە سالىق تولەۋشىلەر شاعىن كاسىپكەرلىكتى قولداۋ جانە دامىتۋ ماقساتىندا بۇرىن ەنگىزىلگەن ارنايى سالىق رەجيمدەرىن (سرپ) پايدالانعانى انىقتالعانىن باياندادى.
"قارجى ءمينيسترىنىڭ اقپاراتىنان سالىق جۇكتەمەسىن وڭتايلاندىرۋدىڭ ءارتۇرلى سحەمالارىن قولدانا وتىرىپ، مىندەتىن ادال اتقارمايتىن كاسىپكەرلەر بارىن كورىپ وتىرمىز. ميللياردتاعان اينالىممەن ولار بيۋدجەتكە وزدەرىنىڭ تاپقان پايداسىنا مۇلدەم سايكەس كەلمەيتىن سومالاردى تولەيدى. بىزدە وسىنداي ءىرى كومپانيالاردىڭ تولىق ءتىزىمى بار. ول تىزىمدە BI Group، BAZIS جانە باسقا دا كوپتەگەن ءىرى قۇرىلىس كومپانياسى ءجۇر. ەكونوميكانىڭ باسقا سالالارىندا جۇمىس ىستەيتىن بەلگىلى ءارى تانىمال مەيرامحانالار، فيتنەس-كلۋبتار جانە ءارتۇرلى كومپانيالار بار. وسى مۇمكىندىكتى پايدالانا وتىرىپ، ءقازىر سالىق جۇكتەمەسىن وڭتايلاندىرۋدىڭ ءتۇرلى سحەمالارىن قولداناتىن ءىرى كومپانيالاردىڭ يەلەرى مەن باسشىلارىنا قاراتا ايتقىم كەلەدى. بۇگىن-ەرتەڭ سىزدەردىڭ كومپانيالارىڭىزعا سالىق ورگاندارىنان قوسىمشا سالىق سومالارىن تولەۋ قاجەتتىلىگى تۋرالى حابارلامالار كەلىپ تۇسەدى"، - دەدى بەكتەنوۆ.
ولجاس بەكتەنوۆ كاسىپكەرلەردەن ەكى اپتا ىشىندە سالىق ورگاندارىنا قوسىمشا سالىق دەكلاراسيالارىن تاپسىرۋدى جانە شىنايى سالىق سوماسىن تولەۋدى سۇرادى.
