Bas shtab basshysy Valerii Gerasimovke áskeri operatsiia daiyndaý, Qaýipsizdik keńesiniń tóraǵasy Nikolai Patrýshevke armian oppozitsiiasyn kúsheitip, Erevandaǵy qoǵamdyq pikirdi retteý tapsyryldy.
Jospar eki stsenariiden turady. Birinshisi, qarýsyz saiasi operatsiia.
Qazir FSB armian parlamentindegi oppozitsiialyq fraktsiialarmen tyǵyz qarym-qatynas ornatqan.
Reseidiń Qarabaqtyń Ázirbaijanǵa qaitýyna qarsylyq bildirmeýi, osy arqyly Armeniia premeri, eýrosaiasatker Pashiniandy bilikten ketirýge baǵyttalǵan edi.
Resei oppozitsiia serkesi Ishhan Sagateliandi bilikke alyp kelýge múddeli. Artynan Sagatelian "Reseimen birge bolmasaq, Ázirbaijan Zangezýr koridoryn jasaý úshin Siýnik oblysyn tartyp alady" degen jeleýmen, Armeniiany odaqtyq memleketke (Resei-Belarýs) kirgizýi kerek.
Eger Pashinian blogy jeńilmei, Armeniia eýrointegratsiiany kúsheitse, onda Resei Armeniiany ODKB-dan shyǵýǵa itermelemek.
Resmi Erevan ODKB-dan ketkennen keiin, "ózin NATO-dan qorǵaý" syltaýymen, Armeniiaǵa 30 batalondy taktikalyq toptan quralǵan ásker engizilip, artynan Rosgvardiia jiberý jospary oilastyryldy.
Resei Armeniianyń áskeri potentsialyn, territorialdyq qorǵanys qurý múmkindigin barynsha barlap qoidy.
Resei Armeniiany tym álsiz dep sanap otyr. Sondyqtan Ýkrainadaǵy soǵyspen bir ýaqytta Armeniiany da rettep tastaityn qaýqar bar degen pikirde.
Tek, bas shtabtyń oiynsha, operatsiia merzimi bir aptadan aspaýy tiis. Bul rette, Reseidiń Frantsiianyń soǵysqa aralasý múmkindigin nege eskermei otyrǵany túsiniksiz.
Frantsiiada armian lobbii myqty bolǵandyqtan, shetel legiondaryn kómekke jiberý múmkindigin joqqa shyǵarýǵa bolmaidy.
NATO Reseidiń Kavkazdaǵy áskeri manevrlaryn barlap, Reseidiń Ýkrainamen qatar Armeniiadaǵy soǵys balshyǵyna batyp qalýy alians úshin tamasha sheshim bolmaq.
Frantsiiaǵa tolyq kart-blansh usynylatyny anyq. Bastysy, Reseidiń soǵystan tez shyǵyp ketýine múmkindik bermeý kerek. Reseidiń bólshektenýi osy Kavkazdaǵy soǵystan bastalady degen de jospar bar.
Al Reseidiń 15 jyldyq strategiialyq josparynda kerisinshe: ol Armeniiany rettep tastaidy da, Moldovamen ainalysady. Sodan keiin Qazaqstan jaqty kóredi.
Genshtab josparynsha, Qytaimen saiasi ýaǵdalastyq bolmaiynsha, Qazaqstanmen soǵysýǵa bolmaidy. Al Qaýipsizdik keńesi Qytaidyń Qazaqstan máselesinde Reseimen kelispeitinin jáne qatań eskertý jasaitynyn boljaǵan. Nemese Sahalin men Blagoveshenskti Qytaiǵa syilaýlary kerek.
Resei josparynda Qazaqstan-Ózbekstan blogymen gipotetikalyq soǵystyń orasan qiyn bolatyny eskerilgen. Qazaqstannyń modernizatsiialanyp jatqan áskeri potentsialy, oǵan qosa 100 paiyz Ózbekstan, Ázirbaijan, Túrkiianyń áskeri qoldaýy bolatyny esepke alynyp otyr.
Ózbekstan men Qazaqstannyń demografiiasy, halqy jas ekeni, mobilizatsiialyq potentsialy Reseiden kem túspeitini jazylǵan. Eń bastysy, Qytai kelispese Resei Qazaqstanǵa múlde kire almaidy. Kelispei soǵys bastaityn bolsa, Qytaidyń áskeri áleýetimen kúsh synasýǵa májbúr bolady.
Biraq Resei Qazaqstandaǵy soǵysqa jetemin degenshe, batys frontynan-aq ábden álsirep, ózi ydyrap ketetin jaǵdaida otyr. Jospar - qaǵazǵa jazylǵan ótirik dúnie. "Kievti 3 kúnde basyp alatyndar", ózderiniń sózi men isi qanshalyqty qabyspaitynyn búkil álemge dáleldep úlgerdi.
