QR Memlekettik qyzmet isteri agenttigi Túrkistan oblysynyń Memlekettik sáýlet-qurylys baqylaý basqarmasynyń basshysy Sultanǵali Jalyquldy tóbeleske qatysqany úshin qyzmetinen bosatýdy usyndy, dep habarlaidy Dalanews.kz
Eske salaiyq, qarasha aiynda áleýmettik jelide janjal kezinde túsirilgen video taraǵan bolatyn. Jýrnalist Mihail Kozachkovtyń aitýynsha, videodaǵy adamdardyń biri – sheneýnik Sultanǵali Jalyqul. Ol qarsylasyna soqqy berip, jaq súiegin syndyrdy degen boljam aitylǵan.
Memlekettik qyzmet isteri agenttigi Sultanǵali Jalyquldyń janjalǵa qatysqanyn rastady. Agenttiktiń Túrkistan oblysy boiynsha departamenti memlekettik qyzmetshiniń tóbeleske qatysý faktisi boiynsha qyzmettik tekseris júrgizgen. 5 jeltoqsanda etika keńesi tiisti sheshim qabyldady.
"Keńes sheshimimen Túrkistan oblysynyń Memlekettik sáýlet-qurylys baqylaý basqarmasynyń basshysy S.Jalyqulǵa qatysty qyzmettik ádep normalaryn buzǵany úshin «atqaryp otyrǵan laýazymynan bosatý» túrindegi tártiptik jaza qoldaný usynyldy. Ádep jónindegi keńes S.Jalyqul tarapynan oryn alǵan turpaiy, qoǵamǵa jat minez-qulyqty, sondai-aq memlekettik organnyń bedelin túsiretin áreket jasaý arqyly jalpyǵa ortaq moraldyq-etikalyq normalardy buzý faktisin anyqtady", - delingen habarlamada.
