Parovoleibol boiynsha sporttyq is-shara Jańaózen qalasynyń 55 jyldyǵy, Mańǵystaý oblystyq máslihatynyń 30 jyldyǵy jáne múmkindigi shekteýli jandarǵa arnalǵan "Alǵa" sport klýbynyń qurylǵanyna 30 jyl tolýyna orai uiymdastyryldy.
Biriktirilgen týrnirge 32 oiynshy men tórt komanda qatysty. Olar Jańaózen qalasynan "Ózenmunaigaz", Aqtaý qalasynan Mańǵystaý ákimdiginiń komandasy, "KazPetroDrilling” bas demeýshi komandasy jáne "Juldyzdar" komandasy.
Komandada tirek-qimyl apparaty buzylǵan sportshylar da, otyrǵan qalypta oinaǵan adamdar da bolǵanyn atap ótken jón.
Týrnirdiń finalynda Mańǵystaý oblysy ákimdiginiń komandasy men Jańaózen qalasynyń "Ózenmunaigaz" komandasy kezdesti. Úsh oiynnyń qorytyndysy boiynsha Jańaózen komandasy 2:1 esebimen jeńiske jetti. Úshinshi oryndy "Juldyzdar" jáne "KazPetroDrilling" komandalary ózara bólisti.
Mańǵystaý oblysynda toǵyz sport túrimen shuǵyldanatyn múmkindigi shekteýli 845 sportshy bar. Olar fizikalyq ózgeshelikterine qaramastan sportpen shuǵyldanyp júrgen, rýhy biik jandar.
Jańaózende 1993 jyly qurylǵan múmkindigi shekteýli jandarǵa arnalǵan "Alǵa" klýby jumys isteidi. Qazirgi ýaqytta Quralbek Seidovtyń tóraǵalyǵymen jumys isteitin klýbta jeti úiirme jumys isteidi, onda 60 adam sportpen belsendi túrde ainalysady.
Aita keteiik, Mańǵystaýdan múmkindigi shekteýli úsh sportshy Qytaidaǵy Paralimpiada oiyndarynda Qazaqstannyń atynan qatysady. Meiirbek Ótepov – ústel tennisi boiynsha, Erbolat Altaev – paravoleiboldan jáne Ǵani Esentemirov – parapaýerliftingten.
Sonymen qatar, biyl Qazaqstan tarihynda tuńǵysh ret bizdiń voleibolshylar Parijdegi 2024 jylǵy XVII Jazǵy Paralimpiada oiyndaryna qatysýǵa litsenziia aldy. Qazaqstandyq quramaǵa úsh mańǵystaýlyq kiredi. Olar Erbolat Altaev pen Baýyrjan Orazǵaliev jáne olardyń jattyqtyrýshysy Quralbek Seidov.
– Paraolimpiadalyq sportshylar óz sheberlikterin kórsetip qana qoimai, bárimizge úlgi bola bildi. Sportpen shuǵyldaný úlken erik-jigerdi, shydamdylyq pen tabandylyqty qajet etedi. Paraolimpiadashylardyń sportqa degen adaldyǵy bizdiń elimizdiń atyn búkil álemge tanymal etetinine senimdimiz.
Bul eń aldymen sportshylardyń, olardyń jattyqtyrýshylarynyń jáne múmkindigi shekteýli jandarǵa arnalǵan klýbtardyń eńbegi. Biz Mańǵystaýda salaýatty ómir saltyn nasihattaý jáne deni saý ult qurý maqsatynda, jańa sport ǵimarattaryn salý jáne sport keshenderine jóndeý jumystaryn júrgizýdemiz, – dep atap ótti Nurlan Noǵaev.
Is-shara "Alǵa" klýbynyń 30 jyldyǵyna arnalǵan merekelik kontsertpen aiaqtaldy, onda jergilikti ártister óner kórsetti. Óńirde parasporttyń damýyna eleýli úles qosqan jandar marapattaldy.
