پاروۆولەيبول بويىنشا سپورتتىق ءىس-شارا جاڭاوزەن قالاسىنىڭ 55 جىلدىعى، ماڭعىستاۋ وبلىستىق ءماسليحاتىنىڭ 30 جىلدىعى جانە مۇمكىندىگى شەكتەۋلى جاندارعا ارنالعان "العا" سپورت كلۋبىنىڭ قۇرىلعانىنا 30 جىل تولۋىنا وراي ۇيىمداستىرىلدى.
بىرىكتىرىلگەن تۋرنيرگە 32 ويىنشى مەن ءتورت كوماندا قاتىستى. ولار جاڭاوزەن قالاسىنان "وزەنمۇنايگاز"، اقتاۋ قالاسىنان ماڭعىستاۋ اكىمدىگىنىڭ كومانداسى، "KazPetroDrilling” باس دەمەۋشى كومانداسى جانە "جۇلدىزدار" كومانداسى.
كوماندادا تىرەك-قيمىل اپپاراتى بۇزىلعان سپورتشىلار دا، وتىرعان قالىپتا ويناعان ادامدار دا بولعانىن اتاپ وتكەن ءجون.
بۇل ەرەكشە ويىندا ءارتۇرلى الەۋمەتتىك توپتاعى ادامدار بىرگە باسەكەگە ءتۇسىپ، وزدەرىنىڭ سپورتتىق قابىلەتتەرىن كورسەتتى. جارىسقا باتىس قازاقستان، اقتوبە، اتىراۋ، قىزىلوردا جانە تۇركىستان وبلىستارىنىڭ پاروسپورتشىلارى قاتىستى.
ءتۋرنيردىڭ فينالىندا ماڭعىستاۋ وبلىسى اكىمدىگىنىڭ كومانداسى مەن جاڭاوزەن قالاسىنىڭ "وزەنمۇنايگاز" كومانداسى كەزدەستى. ءۇش ويىننىڭ قورىتىندىسى بويىنشا جاڭاوزەن كومانداسى 2:1 ەسەبىمەن جەڭىسكە جەتتى. ءۇشىنشى ورىندى "جۇلدىزدار" جانە "KazPetroDrilling" كوماندالارى ءوزارا ءبولىستى.
ماڭعىستاۋ وبلىسىندا توعىز سپورت تۇرىمەن شۇعىلداناتىن مۇمكىندىگى شەكتەۋلى 845 سپورتشى بار. ولار فيزيكالىق وزگەشەلىكتەرىنە قاراماستان سپورتپەن شۇعىلدانىپ جۇرگەن، رۋحى بيىك جاندار.
سونىمەن قاتار، وڭىردە مۇمكىندىگى شەكتەۋلى جاندارعا ارنالعان ءبىر سپورت كلۋبى جۇمىس ىستەيدى جانە وعان 591 ادام قاتىسادى.
جاڭاوزەندە 1993 جىلى قۇرىلعان مۇمكىندىگى شەكتەۋلى جاندارعا ارنالعان "العا" كلۋبى جۇمىس ىستەيدى. قازىرگى ۋاقىتتا قۇرالبەك سەيدوۆتىڭ توراعالىعىمەن جۇمىس ىستەيتىن كلۋبتا جەتى ۇيىرمە جۇمىس ىستەيدى، وندا 60 ادام سپورتپەن بەلسەندى تۇردە اينالىسادى.
ايتا كەتەيىك، ماڭعىستاۋدان مۇمكىندىگى شەكتەۋلى ءۇش سپورتشى قىتايداعى پاراليمپيادا ويىندارىندا قازاقستاننىڭ اتىنان قاتىسادى. مەيىربەك وتەپوۆ – ۇستەل تەننيسى بويىنشا، ەربولات التايەۆ – پاراۆولەيبولدان جانە عاني ەسەنتەمىروۆ – پاراپاۋەرليفتينگتەن.
سونىمەن قاتار، بيىل قازاقستان تاريحىندا تۇڭعىش رەت ءبىزدىڭ ۆولەيبولشىلار پاريجدەگى 2024 جىلعى XVII جازعى پاراليمپيادا ويىندارىنا قاتىسۋعا ليسەنزيا الدى. قازاقستاندىق قۇراماعا ءۇش ماڭعىستاۋلىق كىرەدى. ولار ەربولات التايەۆ پەن باۋىرجان ورازعالييەۆ جانە ولاردىڭ جاتتىقتىرۋشىسى قۇرالبەك سەيدوۆ.
ءوڭىر باسشىسى نۇرلان نوعايەۆ سپورتشىلاردى قۇتتىقتاپ، الداعى وليمپياداعا ساتتىلىك تىلەدى. سونداي-اق "العا" كلۋبىنا ايماقتاعى پاراسپورتتى دامىتۋعا قوسقان زور ۇلەسى ءۇشىن العىسىن ءبىلدىردى.
– پاراوليمپيادالىق سپورتشىلار ءوز شەبەرلىكتەرىن كورسەتىپ قانا قويماي، بارىمىزگە ۇلگى بولا ءبىلدى. سپورتپەن شۇعىلدانۋ ۇلكەن ەرىك-جىگەردى، شىدامدىلىق پەن تاباندىلىقتى قاجەت ەتەدى. پاراوليمپياداشىلاردىڭ سپورتقا دەگەن ادالدىعى ءبىزدىڭ ەلىمىزدىڭ اتىن بۇكىل الەمگە تانىمال ەتەتىنىنە سەنىمدىمىز.
بۇل ەڭ الدىمەن سپورتشىلاردىڭ، ولاردىڭ جاتتىقتىرۋشىلارىنىڭ جانە مۇمكىندىگى شەكتەۋلى جاندارعا ارنالعان كلۋبتاردىڭ ەڭبەگى. ءبىز ماڭعىستاۋدا سالاۋاتتى ءومىر سالتىن ناسيحاتتاۋ جانە دەنى ساۋ ۇلت قۇرۋ ماقساتىندا، جاڭا سپورت عيماراتتارىن سالۋ جانە سپورت كەشەندەرىنە جوندەۋ جۇمىستارىن جۇرگىزۋدەمىز، – دەپ اتاپ ءوتتى نۇرلان نوعايەۆ.
ءىس-شارا "العا" كلۋبىنىڭ 30 جىلدىعىنا ارنالعان مەرەكەلىك كونسەرتپەن اياقتالدى، وندا جەرگىلىكتى ارتىستەر ونەر كورسەتتى. وڭىردە پاراسپورتتىڭ دامۋىنا ەلەۋلى ۇلەس قوسقان جاندار ماراپاتتالدى.
