Mańyzdy áleýmettik nysannyń ashylýyna oblys ákimi Beibit Isabaev qatysyp, ortalyqtyń basshysy ári negizin qalaýshy Eldos Baialyshbaevqa alǵysyn bildirdi:
– Búgin biz Taldyqorǵan qalasynda «Asar» ońaltý kesheniniń ashylǵanyna kýá bolyp otyrmyz. Bul ońaltý ortalyǵy erekshe qajettilikteri bar halyqqa sapaly qyzmet kórsetýge járdemdesedi dep sanaimyn. Barshaǵa kedergisiz, qoljetimdi orta qurý – memlekettik saiasattyń mańyzdy baǵyty jáne búkil qoǵamnyń mindeti, bul týraly Memleket basshysy únemi aityp otyrady.
Biyl 162 áleýmettik nysandy beiimdeýge 472,6 mln teńge bólindi. Bul jumystardy qyrkúiek aiynyń sońyna deiin tolyq aiaqtaimyz. Budan ári osy baǵyttaǵy jumys jalǵasatyn bolady, – dep atap ótti óńir basshysy. Biyl Taldyqorǵanda «Qamqorlyq» qorymen birlesip aýtizmi jáne basqa da aqyl-oi kemistigi bar balalarǵa arnalǵan ortalyq ashylǵanyn, qazir onyń bazasynda 18 jastan asqan azamattar úshin de jaǵdai jasaý josparlanyp otyr.
Aldymen joldy aiaqtap, sodan keiin injenerlik infraqurylym salýymyz qajet. Jalpy búginde Taldyqorǵanda ońaltý qyzmetteri 300 adamǵa kórsetilip otyrsa, sonyń 54-i bala.
Osyǵan bailanysty Jetisý jurtshylyǵynyń atynan ońaltý ortalyǵynyń basshysy Eldos Baialyshbaevqa alǵysymdy bildiremin. Men bul ortalyqta bolǵanmyn, búgin ashylýy ótkizilip otyrǵanyna qýanyshtymyn. Biz óz tarapymyzdan qoldaý kórsetýdi jalǵastyramyz.
Munda gaz tartyp beremiz, shamamen 1,5 ai ishinde jumysty aiaqtaimyz. Osyndai ortalyqtar erekshe kútimge muqtaj azamattardyń áleýmettik-turmystyq ortaǵa beiimdelýine, sondai-aq kórsetiletin ońaltý qyzmetteriniń sapasyn arttyrýǵa yqpal etetinine senimdimin, – degen Beibit Isabaev budan ári Eńbek jáne halyqty áleýmettik qorǵaý ministriniń quttyqtaý jedelhatyn oqyp berdi. Onda Eldos Baialyshbaevtyń áleýmettik qorǵaý isine qosqan úlesi atalyp ótilip, ortalyq basshysy men ujymynyń atyna tilekter aityldy.
Qatysýshylardy ortalyqtyń ashylýymen Taldyqorǵan qalasynyń «Er» tirek qimyl júiesi zaqymdanǵan múgedekterdiń qoǵamdyq birlestiginiń tóraǵasy, qalalyq máslihat depýtaty Roza Aqjarkenova quttyqtady.
– Eldos, seniń bizdiń qalamyzda bolǵanyńa men rizamyn. Bári neden, qalai bastalǵanyn bilemiz, jáne osyndai jaǵdaiǵa jetip otyrǵanyń – ózińniń qajyrly eńbegińniń nátijesi.
Kóbisi ortalyqqa arbamen kirip, ońaltýdan keiin baldaqpen shyǵady. Eldosqa qoldaý kórsetip, jobany júzege asyrýǵa kómekteskenderdiń barlyǵyna shyn júrekten alǵys bildiremin, óitkeni bul jai ǵana paidaly is qana emes, naǵyz igi, izgi is. Denderińiz saý bolsyn, ómirdi baǵalańyzdar jáne bir-birińizge qamqor bolyńyzdar, – dedi Roza Aqjarkenova óz quttyqtaýynda.
Jubaiy ortalyqta ońaltýdan ótip jatqan Qadira Saǵadieva alǵys sózin aitty.
– Eki jarym jyldan astam ýaqyt boiy biz «Asar» ortalyǵynda em alyp júrmiz. Ortalyq bastapqyda jartylai jertólede boldy, qazir jaryq, jaqsy ǵimaratqa kóship otyr. Kúieýimdi arbamen alyp kelgenbiz, qazir ol baiaý júre bastady. Qyzmetkerlerge qamqorlyqtary úshin kóp rahmet. Endi jańa ortalyqta fiziokabinetke, protsedýralyq kabinetke baramyz. Kabinetteri óte jaqsy jabdyqtalǵan. Eldosqa, onyń otbasyna, týystary men jaqyndaryna densaýlyq tileimin, – dedi ol.
Ortalyqtyń direktory Eldos Baialyshbaevtyń ózi de sóz sóiledi, ol jobany iske asyrý jáne ońaltý ortalyǵyn salý kezinde kómek kórsetkenderdiń barlyǵyna alǵysyn bildirdi, sondai-aq ortalyqtyń qurylý tarihyna qysqasha toqtaldy:
– 2015 jyldan bastap osy jobany iske asyra bastadym, úsh jyl qatarynan «Sábi» qorynyń «óz biznesińdi qur» konkýrsyna qatystym. Úshinshi jyl degende jeńiske jettim. Sonymen qatar ár jyldary Japoniia elshiliginiń jabdyq satyp alýǵa beriletin «Shóp tamyrlary» grantyn eki ret jeńip aldym.
Aitpaqshy, halyqaralyq grantty bir adamnyń eki ret utýy álemdegi ekinshi jaǵdai eken. Bul zamanaýi jetildirilgen jabdyqty satyp alýǵa úlken qoldaý boldy.
«Damý» qorynyń jeńildik sharttary bar kredittik qarajatyn da paidalandym. Ákimdik maǵan qurylys salatyn jer telimin berdi. Jalpy kóp ýaqyt ketti, qanshama kúsh jumsalyp, jumys jasaldy. Sonyń bári nátijesin berdi. Búgin Ortalyq resmi túrde ashylyp otyr. Biz habarlasqandardyń barlyǵyna kómektesýge tyrysamyz.
Osy múmkindikti paidalana otyryp, óz ujymyma alǵysymdy bildiremin. Bastapqyda bizde 4-5 adam ǵana jumys istegen, qazir olardyń sany 30-ǵa jýyqtady. Sizder bolmasańyzdar osyndai jetistikke jetpes edim, – dep Eldos birqatar azamattarǵa alǵys hattar tapsyrdy.
Atap ótsek, «Asar» sporttyq-ońaltý ortalyǵy ǵimaratynyń jalpy aýdany 700 sharshy metrdi quraidy. Fizioterapiia, kinezoterapiia kabinetteri, massaj jáne emdeý kabinetteri, psiholog jáne logoped kabinetteri, býfet bar, kedergisiz orta qalyptastyrý úshin barlyq jaǵdai jasalǵan. Jobanyń jalpy quny – 120 mln teńge. Memlekettik áleýmettik tapsyrystyń arqasynda Ortalyqta qyzmetter tegin kórsetiledi, munda qyzmet alý úshin dárigerdiń taǵaiyndaýy qajet.
Jalpy «Asar» sporttyq-ońaltý ortalyǵynyń joǵary tehnologiialyq jabdyqtary erekshe. Mysaly, ispandyq ekzoskelet adamǵa qaitadan júrýdi úirenýge kómektesedi. «Bul salmaǵy nebári 17 kg bolatyn model, reseilik óndiris modeliniń salmaǵy 46 kg. Qazaqstanda mundai model joq, bul model qozǵalys datchikteriniń fýnktsiiasyna ie. Trenajerdiń quny shamamen 107 mln. teńge», – dep túsindirdi ortalyq direktory.
Zamanaýi emdeý jabdyqtarynyń taǵy biri – «Lýna» kópfýnktsionaldy robottanǵan ońaltý júiesi. Bul erekshe trenajer nevrologiialyq jáne ortopediialyq patologiiasy bar, bastan ótkergen jaraqattary men aýrýlaryna bailanysty qozǵalys buzylystary bar naýqastardy emdeidi. «Asar» ortalyǵynda AQSh, Japoniia, Germaniia, Italiia, Ulybritaniia, Ispaniia, Polshadan ákelingen eresekter men balalardy ońaltýǵa arnalǵan 30-dan astam trenajerler men arnaiy jabdyqtar bar.
Fotosýretter avtorlary: Jeńis Ysqabai, Dmitrii Erofeev
