Óńirdiń iri kompaniiasy ShQO ákimdigimen yntymaqtastyq týraly memorandým aiasynda densaýlyq saqtaý uiymyna meditsinalyq tehnika satyp alýdy qarjylandyrdy. Ridder aýrýhanasynda zamanaýi videogastroskop, beinekolonoskop, anesteziia jáne tynys alý apparaty jáne murynǵa arnalǵan tynys alý apparaty siiaqty quraldar paida boldy. Bul jabdyqqa jumsalǵan shyǵyndardyń jalpy somasy shamamen 100 mln teńgeni qurady,- dep habarlaidy Dalanews.kz Altainews.kz saityna silteme jasap.
Eń qyzyǵy, meditsinalyq tehnikany satyp alý týraly usynys ridderlikterdiń tarapynan túsken. Olar 2023 jyly uiymdastyrylǵan «Arman qala» áleýmettik aktsiiasy aiasynda qajetti jabdyqtardyń tizimin bergen. «Kaztsink» barlyq usynystardyń tolyq tizbesin jasap, olardy depýtattarmen jáne oblys ákimdigimen talqylap, birinshi kezekte satyp alatyn aspaptardy anyqtaidy. Quraldardyń bir bóligi aǵymdaǵy jyly iske asyrý úshin birlesken memorandýmǵa engizildi.
–Búgingi tehnikalyq jańartý birden úsh taraptyń: bizdiń kompaniiamyzdyń, Ridder turǵyndary men memlekettiń yntymaqtastyǵynyń jarqyn mysaly. Biyl biz oblystyq ákimdikpen 1,5 mlrd teńgeniń yntymaqtastyq memorandýmyna qol qoidyq. Búgingi oqiǵa memorandýmda kórsetilgen jobalardyń júzege asýynyń bir kezeńi. Endi qala turǵyndaryna eń zamanaýi deńgeide qosymsha tekserý jáne emdeý túrleri júrgiziledi. Eń mańyzdysy qala turǵyndarynyń pikirin eskerdik. Biz qalany damytýdyń eń suranysqa ie baǵyttaryna nazar aýdarýǵa tyrysamyz. Ridder biz úshin óte mańyzdy jáne ony qoldaý korporativtik áleýmettik jaýapkershiliktiń óte ózekti baǵyttarynyń biri bolyp tabylady, – dep túsindirdi «Kaztsink» kompaniiasynyń ákimshilik máseleler jónindegi atqarýshy direktory Andrei Lazarev.
Ridder qalasynyń ákimi Dýman Rahmetqaliev Kaztsink siiaqty alpaýyt kásiporynnyń qalalyqtar úshin kóptegen igi bastamalardy júzege asyryp otyrǵanyn aitty.
– Bizdiń qalada 6800 adam osy kompaniiada jumys isteidi. Oblystyq deńgeide qol qoiylǵan memorandýmda Ridder qalasyna qatysty jeke jobalar boldy. Sonyń nátijesinde meditsinalyq jabdyqtarǵa qol jetkizildi. Memleket tarapynan zamanaýi aýrýhana salynyp jatyr. Ony kelesi jyly paidalanýǵa beremiz, – dedi senimmen Dýman Rahmetqaliev.
Aýrýhanaǵa alynǵan jańa quraldarmen qazirdiń ózinde birneshe naýqas tekserildi. Aýrýhananyń hirýrg dárigeri, endoskopist Muhit Halyqov videojúie siiaqty quraldyń basqa aýdandarda joq ekenin maqtanyshpen aitady.
– Bul quraldy biz kópten armandaǵan edik. Áriptesterimizben habarlasyp otyramyz, mundai aspap aýdandyq aýrýhanalardyń birinde joq. Beinejúie gastroskop jáne kolonoskoptan turady. Gastroskoppen asqazan-ishek joldaryn, óńeshti teksersek, beinekolonoskopiia ishekterdegi dertti anyqtaidy. Aspaptar mólsheri 0,5 mm aspaityn isikterdi de kóredi, obyrdyń aldyńǵy satysyn, basqa da kóptegen patologiialardy anyqtaidy, barlyǵy monitorǵa shyǵyp turady. Taǵy bir artyqshylyǵy, patsienttiń qalaýymen tekserý qorytyndysyn fleshkaǵa jazyp bere alamyz, – deidi endoskopist dáriger Muhit Halyqov.
Dárigerdiń aitýynsha, qazirdiń ózinde eki naýqastyń asqazany, taǵy eki patsienttiń ishekteri tekserilgen. Aitpaqshy, ótken jyldan bastap kolonoskopiia narkozdyń kómegimen jasalady.
Ridderlik dárigerlerdiń qýanyshyna ainalǵan ekinshi aspap – «Mindray» narkozdy-tynys alý, ókpeni jasandy jeldetý apparaty, aýrýhana úshin óte qajet aspaptardyń biri. Onyń erekshelikteri týraly bizge anesteziologiia-reanimatsiia bólimshesiniń meńgerýshisi Maral Tóleýbaiqyzy aityp berdi.
– Óte sapaly ári qoldanysta yńǵaily. Biz ony perzenthananyń operatsiia blogynda, bosanatyn áielderge keser tiligin jasaǵan kezde qoldanatyn bolamyz. Buryńǵy quraldardan kóp artyqshylyǵy bar, mysaly, keletin aýany jumsartyp, ylǵaldandyryp, anestetikti mólsherlep jiberedi. Patsienttiń salmaǵy men boiyn engizip, oǵan qansha mólsherde aýa men anestetiktiń qajettigin ózi eseptep beredi. Naýqasty apparattan alyp tastaǵanda ol ózdigimen demalýǵa tez beiimdeledi, – dep túsindirdi anesteziologiia-reanimatsiia bólimshesiniń meńgerýshisi.
Aýrýhananyń bas dárigeri Gúlnar Kitappaeva atalmysh kompaniiamen uzaq jyldar jumys istep kele jatqandaryn aitty.
– Árine, bizdiń barlyq ótinishterimizdi qanaǵattandyrý múmkin emes. Alaida Kaztsink sonyń kóp bóligin óz moinyna alyp keledi. Jyl saiyn jańa meditsinalyq qural-jabdyqtarǵa qol jetkizip otyrmyz. Men ózim osy qalada týyp-óstim. Qazir jastar kelip jatyr. Alynǵan zamanaýi apparattardyń kómegimen turǵyndarǵa sapaly ári bilikti meditsinalyq qyzmet kórsetemiz. Birden diagnostika jasap, emdeý protsedýralaryn jasaýǵa bolady. Sol úshin de kompaniia basshylyǵyna alǵysymyz sheksiz, - degen rizashylyǵyn bildirdi bas dáriger.
