Tarazda qyzdar 9-synyp oqýshysyn aıaýsyz urǵan. Bul týraly jábirlenýshiniń anasy áleýmettik jelide aıtty, dep habarlaıdy Dalanews.kz.
Onyń sózinshe, 7-8 qyz kastet qoldanyp, qyzyn jabylyp uryp ketken. Ol quzyrly organdardan arasha surady.
Jambyl oblysy Polısıa departamenti málimetinshe, bul derek boıynsha qylmystyq is qozǵalǵan, tóbeleske qatysýshylardyń barlyǵy anyqtalyp, polısıa bólimine jetkizilgen.
Kámeletke tolmaǵandardyń ata-analary balalaryn tárbıeleý jónindegi mindetin tıisinshe oryndamaǵany úshin jaýapkershilikke tartylǵan.
"Jasóspirimderdiń áreketi kámeletke tolmaǵandardyń isteri jáne olardyń quqyqtaryn qorǵaý jónindegi komısıa otyrysynda qaraldy. Qorytyndysy boıynsha jasóspirimder profılaktıkalyq esepke alyndy. Qazir oqıǵanyń barlyq mán-jaıy men sebepterin jan-jaqty anyqtaýǵa baǵyttalǵan tergeý júrgizilip jatyr. Nátıjesine sáıkes tıisti prosesýaldyq sheshim qabyldanady", - dedi polısıa.
