Almaty qalasynda ótken «Daryndy balalarǵa – talantty ustaz – 2026» atty muǵalimder arasyndaǵy respýblikalyq olimpiadada Qyzylorda oblysy, Aral aýdanynan qatysqan ustaz joǵary nátije kórsetti, dep habarlaidy Dalanews.kz
Atalǵan bilim báigesinde Qyzylorda oblysy Aral aýdany U.Qaramanov atyndaǵy №262 mektep-gimnaziiasynyń qazaq tili men ádebieti páni muǵalimi Qýanyshov Atabai Qýanyshuly respýblikalyq kezeńde I oryn ielendi.
Olimpiada Almaty qalasyndaǵy Abai atyndaǵy ulttyq mekteptiń bazasynda uiymdastyryldy. Baiqaý eki kezeńnen turdy. Birinshi kezeńde qatysýshylar ózderin tanystyryp, ustazdyq joly men kásibi tájiribesin usyndy. Al ekinshi kezeńde ár muǵalim ózderiniń pedagogikalyq ideialaryn qorǵady.
Baiqaýǵa elimizdiń ár óńirinen 200-ge jýyq muǵalim qatysyp, olar 20–25 adamnan birneshe sektsiiaǵa bólinip, óz jobalaryn qorǵady. Bul kezeńde qatysýshylardyń tek jumysynyń mazmuny ǵana emes, sonymen qatar sóileý sheberligi, aýditoriia aldynda ózin ustaýy jáne pedagogikalyq ideiany TEDx formatynda áserli jetkize bilýi de baǵalandy.
Qýanyshov Atabai Qýanyshuly baiqaýda «Aral óńiriniń ádebi mýltimediialyq kartasy» atty pedagogikalyq ideiasyn usyndy. Jobanyń basty maqsaty – Aral óńirinen shyqqan aqyn-jazýshylardyń ádebi murasyn jańǵyrtyp, ony zamanaýi tehnologiia arqyly oqýshylarǵa tanystyrý. Mýltimediialyq karta arqyly oqýshylar belgili bir aimaqty tańdap, sol óńirden shyqqan qalamgerlerdiń ómiri men shyǵarmashylyǵy týraly málimettermen tanysa alady. Bul joba oqýshylardyń týǵan ólkeniń tarihy men ádebietin tereńirek tanýyna múmkindik beredi.
Olimpiada 10 aqpan kúni ótip, qatysýshylar óz jobalaryn qorǵady. Al 11 aqpan kúni baiqaýdyń qorytyndysy shyǵarylyp, úzdikter marapattaldy. Qazylar alqasynyń sheshimimen araldyq ustazdyń pedagogikalyq ideiasy joǵary baǵalanyp, respýblikalyq kezeńniń I oryn júldesine ie boldy.
Bul jetistik – ustazdyń shyǵarmashylyq izdenisiniń, bilim men tájiribesiniń jemisi. Osyndai jańashyl jobalar arqyly ulttyq ádebi murany nasihattap, ony jas urpaqqa zamanaýi tásilmen jetkizý – búgingi bilim berý júiesiniń mańyzdy baǵyttarynyń biri.
