Sońǵy jyldary elimizde bilim berý salasyn damytýǵa erekshe kóńil bólinip keledi. Pedagog mamandyǵynyń bedelin arttyrý, oqý baǵdarlamalaryn jetildirý, stýdentterdiń bilimge degen qyzyǵýshylyǵyn kúsheitý – búgingi kúnniń basty mindetteriniń biri. Osy baǵytta joǵary oqý oryndary da túrli jańashyl ádister men tehnologiialardy engizip jatyr, dep habarlaidy Dalanews.kz.
Elimizdiń tuńǵysh joǵary oqý orny – Abai atyndaǵy Qazaq ulttyq pedagogikalyq ýniversitetiniń Akademiialyq máseleler jónindegi prorektory Baný Muqataiqyzy Narbekovanyń aitýynsha, sońǵy jyldary pedagog mamandyǵynyń qoǵamdaǵy mártebesi aitarlyqtai kóterilgen.
Onyń sózinshe, 2019 jyly qabyldanǵan «Pedagog mártebesi týraly» zań ustazdardyń áleýmettik jaǵdaiyn jaqsartýǵa jáne kásibi damýyna múmkindik berdi. Bul zań pedagogtardyń quqyqtaryn qorǵap, olardyń qyzmetin naqty reglamentteýge jol ashty.
«Zań qabyldanǵannan keiin pedagogtardyń áleýmettik kepildikteri kúsheiip, jalaqysy artty. Sonymen qatar muǵalimderdiń óz qyzmetine qatysy joq jumystarǵa tartylýyna shekteý qoiyldy. Bul ustazdardyń negizgi mindeti – bilim berý men tárbieleýge tolyq kóńil bólýine múmkindik berdi», – deidi Baný Narbekova.
Prorektordyń aitýynsha, pedagogtardyń mártebesiniń artýy bul mamandyqqa keletin jastardyń da kóbeiýine áser etken. Qazirgi tańda pedagogikalyq baǵytqa joǵary ball jinaǵan talapkerler jii túsip jatyr.
«Sońǵy jyldary pedagog mamandyǵyn tańdaityn “Altyn belgi” ieleriniń sany aitarlyqtai artty. Buryn bul kórsetkish shamamen myńǵa jýyq bolsa, qazir úsh myńǵa jetti. Byltyr jańa oqý jylynda bizdiń ýniversitetke 791 “Altyn belgi” iesi oqýǵa tústi. Bul – talapkerlerdiń pedagog mamandyǵyna degen qyzyǵýshylyǵynyń artqanyn kórsetedi», – deidi ol.
Sonymen qatar pedagogika mamandyqtaryna qoiylatyn talaptar da kúsheigen. Qazir bul baǵytqa túsýdiń shektik baly 75-ke deiin kóterilgen. Munyń bári bilim sapasyn arttyrýǵa baǵyttalǵan.
Ýniversitet stýdentterdiń bilimge degen umtylysyn arttyrý úshin zamanaýi tehnologiialardy keńinen qoldanýǵa basymdyq berip otyr. Sonyń ishinde tsifrlandyrý, jasandy intellekt, interaktivti oqytý ádisteri keńinen engizilgen.
«Búginde bilim berý salasynda jańa tehnologiialardyń róli artyp keledi. Sondyqtan bolashaq pedagogtardy daiarlaý barysynda biz geimifikatsiia elementterin, jasandy intellekt múmkindikterin, interaktivti sabaqtardy keńinen paidalanamyz. Ýniversitet aýditoriialarynyń basym bóligi interaktivti taqtalarmen jabdyqtalǵan», – deidi prorektor.
Sondai-aq ýniversitette dýaldy oqytý tehnologiiasy da engizilgen. Bul júie arqyly stýdentter teoriialyq bilimmen qatar mektepterde tájiribeden ótedi.
Qazir tórtinshi kýrs stýdentteri jarty jyl boiy mektepterde jumys istep, muǵalimderge kómekshi retinde oqý protsesine tikelei qatysady. Ýniversitet ókilderi mekteptermen turaqty bailanysta bolyp, stýdentterdiń tájiribelik sabaqtaryn baqylap otyrady. Mektep basshylary men ustazdar bolashaq pedagogtardyń daiyndyq deńgeii joǵary ekenin atap ótýde.
Budan bólek, ýniversitette jobalyq oqytý ádisi de qoldanylady. Bul tásil boiynsha stýdentter top bolyp bir taqyrypty tańdap, zertteý jumystaryn júrgizedi.
«Jobalyq jumys stýdentterdiń komandalyq daǵdylaryn damytady. Sonymen qatar olardyń zertteý qabiletin arttyryp, kóshbasshylyq qasietterin qalyptastyrady. Qazir diplomdyq jumystar da jobalyq formatta qorǵalyp jatyr», – deidi Baný Narbekova.
Ýniversitette stýdentterdiń rýhani-adamgershilik tárbiesine de erekshe mán beriledi. Abai atyndaǵy oqý orny bolǵandyqtan, oqý úderisinde Abaidyń rýhani murasy keńinen nasihattalady.
Mysaly, stýdentter «Abaitaný» jáne ulttyq tárbie qundylyqtaryna arnalǵan pánderdi oqidy. Bul bolashaq pedagogtardyń boiyna Abaidyń «tolyq adam» ideiasyn sińirýge baǵyttalǵan.
Sonymen qatar oqý ornynda stýdentterdiń shyǵarmashylyq qabiletin damytýǵa arnalǵan túrli mádeni jobalar júzege asyrylyp keledi. Ýniversitette stýdenttik teatr, ansambl jáne orkestr jumys isteidi.
Bilim alýshylardyń zertteý daǵdylaryn damytýǵa da erekshe kóńil bólinedi. Bakalavriattan bastap stýdentter ǵylymi zertteýlerge qatysyp, óz jumystaryn taldap, saraptamadan ótkizýdi úirenedi. Ýniversitette stýdentterdiń ózin-ózi basqarý júiesi de qalyptasqan. Mysaly, stýdenttik rektorat oqý ornynyń basshylyǵymen tikelei bailanysta jumys isteidi.
Sonymen qatar ýniversitet stýdentterge qosymsha kásibi quzyretter berýge baǵyttalǵan baǵdarlamalardy iske asyryp keledi. Sonyń ishinde mainor jáne mikrokvalifikatsiia baǵdarlamalary arqyly bilim alýshylar birneshe baǵytta bilim alyp, jańa daǵdylardy meńgeredi.
Mysaly, arnaiy pedagogika mamandyǵynda oqityn stýdentterge qosymsha retinde mýzyka nemese sport baǵyttary usynylady. Bul erekshe bilim berý qajettiligi bar balalarmen jumys isteýde tiimdi ádisterdi qoldanýǵa múmkindik beredi.
Osylaisha, Abai atyndaǵy Qazaq ulttyq pedagogikalyq ýniversiteti zamanaýi talaptarǵa sai básekege qabiletti pedagog kadrlardy daiarlaýǵa basymdyq berip otyr. Ýniversitette engizilip jatqan jańa ádister men tehnologiialar bolashaq muǵalimderdiń kásibi deńgeiin arttyryp, bilim berý salasynyń damýyna úles qospaq.
