Qazaqstanda búginnen bastap Ákimshilik quqyq buzýshylyq týraly kodekske engizilgen ózgerister kúshine endi. Endi keibir quqyqbuzýshylyqtar politsiia qyzmetkerleriniń qatysýynsyz-aq, tsifrlyq júie men "aqyldy kameralar" arqyly avtomatty túrde tirkelip, aiyppul rásimdeledi, dep habarlaidy Dalanews.kz.
Buǵan deiin beinebaqylaý kameralary negizinen kólik jyldamdyǵyn asyrý, baǵdarshamnyń qyzyl túsine ótý nemese jol belgilerin buzý siiaqty quqyqbuzýshylyqtardy ǵana anyqtaityn. Al jańa ózgeristerge sáikes, tsifrlyq júie endi basqa da birqatar tártip buzýshylyqtardy tirkep, aiyppul salýǵa múmkindik beredi.
Máselen, júrgizýshiler rólde otyryp telefon qoldansa, qaýipsizdik beldigin taqpasa, kóliktiń jaryq shamdaryn durys paidalanbasa nemese jol qozǵalysyna kedergi keltirse, júie mundai áreketterdi avtomatty túrde tirkeidi. Sondai-aq tehbaiqaýdyń merzimi ótip ketse nemese saqtandyrý polisi bolmasa, aqparattyq baza arqyly bul da birden anyqtalyp, aiyppul rásimdelýi múmkin.
Sonymen qatar jaiaý júrginshiler de jaýapkershilikten tys qalmaidy. Kameralar joldy belgilenbegen jerden kesip ótkenderdi, kóshege qoqys nemese temeki tuqylyn tastaǵandardy, tyiym salynǵan jerde temeki shekkenderdi tirkeýi múmkin. Budan bólek, alkogol ónimderin belgilenbegen ýaqytta satý faktileri de baqylaýǵa alynýy yqtimal.
Júie adamnyń bet-álpetin nemese kólik nómirin taný arqyly derekter bazasymen sáikestendiredi. Eger quqyqbuzýshylyq rastalsa, hattama toltyrylmai-aq aiyppul avtomatty túrde tirkelip, azamattyń telefonyna habarlama jiberiledi.
