2025 jyldyń aiaǵynda avtonesiege balama retinde usynylǵan jeke tulǵalarǵa arnalǵan avtolizing baǵdarlamasy is júzinde keń qoldanysqa engen joq. Iske qosylǵanyna úsh ai ótse de, naryqta mundai kelisim óte az jasalǵan, dep habarlaidy Dalanews.kz.
Bul jaǵdai sala qaýymdastyqtarynyń deregimen salystyrǵanda aiqyn baiqalady. Qazaqstanda jyl saiyn shamamen 200 myń jańa kólik satylady, al olardyń edáýir bóligi avtonesie arqyly rásimdeledi.
Qazaq Expert Club sarapshysy, qarjyger Áigerim Iliiasovanyń aitýynsha, negizgi másele - avtolizingtiń túrlerin kópshiliktiń durys túsinbeýinde.
Sarapshynyń sózinshe, operatsiialyq lizing pen qarjy lizingi - eki túrli model. Operatsiialyq lizing qysqa merzimdi jalǵa berý túrine jatady. Ádette eki jylǵa deiingi merzimge beriledi, al klient kólikti satyp almai-aq paidalanyp, keiin basqa kólikke aýystyra alady. Munda tólemder kóliktiń tolyq qunyn jappaidy.
Al qarjy lizingi uzaq merzimge beriledi jáne keiin kólikti satyp alý mindetin qamtidy. Bul jaǵdaida tólemderge kóliktiń tolyq baǵasy men lizing berýshiniń syiaqysy kiredi. Sonymen qatar, saqtandyrý, tehnikalyq qyzmet kórsetý, kólik salyǵy siiaqty qosymsha shyǵyndardy da klient tóleidi.
Áigerim Iliiasova Qazaqstanda lizing naryǵy 2000 jyldan beri jumys istep kele jatqanyn, alaida buryn mundai qyzmetti negizinen zańdy tulǵalar men kásipkerler paidalanǵanyn aitty.
Onyń pikirinshe, halyq operatsiialyq lizingti kútti. Alaida mundai júie jumys isteýi úshin paidalanylǵan kólikterdi qaita ótkizý naryǵy damyǵan bolýy kerek. Iaǵni kólik prokaty, qaita lizingke berý nemese eski kólikter aýktsiony siiaqty júieler qalyptasýy qajet.
Qazaqstanda lizing kompaniialary ázirge tek qarjy lizingin usyna alady. Sondyqtan usynylǵan avtolizing is júzinde avtonesiege uqsas ónimge ainaldy, tek kóliktiń menshik quqyǵy birden berilmeidi. Sonyń saldarynan oǵan suranys joǵary bolmady.
Sarapshy mundai jaǵdaida avtolizingtiń basty artyqshylyǵy onyń arzan bolýy qajet ekenin aitty. Alaida lizing kompaniialary qarajatty bankterden alatyndyqtan, onyń quny avtonesieden tómen bolmady.
Lizing tólemderin azaitý úshin jeńildetilgen qarjylandyrý bólý, syiaqy mólsherlemesin sýbsidiialaý nemese lizing tólemderin salyqtan bosatý siiaqty sharalar qajet. Biraq mundai bastamalarǵa qosymsha biýdjet qarjysy kerek.
