2025 جىلدىڭ اياعىندا اۆتونەسيەگە بالاما رەتىندە ۇسىنىلعان جەكە تۇلعالارعا ارنالعان اۆتوليزينگ باعدارلاماسى ءىس جۇزىندە كەڭ قولدانىسقا ەنگەن جوق. ىسكە قوسىلعانىنا ءۇش اي وتسە دە، نارىقتا مۇنداي كەلىسىم وتە از جاسالعان، دەپ حابارلايدى Dalanews.kz.
بۇل جاعداي سالا قاۋىمداستىقتارىنىڭ دەرەگىمەن سالىستىرعاندا ايقىن بايقالادى. قازاقستاندا جىل سايىن شامامەن 200 مىڭ جاڭا كولىك ساتىلادى، ال ولاردىڭ ەداۋىر بولىگى اۆتونەسيە ارقىلى راسىمدەلەدى.
Qazaq Expert Club ساراپشىسى، قارجىگەر ايگەرىم ءىلياسوۆانىڭ ايتۋىنشا، نەگىزگى ماسەلە - اۆتوليزينگتىڭ تۇرلەرىن كوپشىلىكتىڭ دۇرىس تۇسىنبەۋىندە.
ساراپشىنىڭ سوزىنشە، وپەراسيالىق ليزينگ پەن قارجى ليزينگى - ەكى ءتۇرلى مودەل. وپەراسيالىق ليزينگ قىسقا مەرزىمدى جالعا بەرۋ تۇرىنە جاتادى. ادەتتە ەكى جىلعا دەيىنگى مەرزىمگە بەرىلەدى، ال كليەنت كولىكتى ساتىپ الماي-اق پايدالانىپ، كەيىن باسقا كولىككە اۋىستىرا الادى. مۇندا تولەمدەر كولىكتىڭ تولىق قۇنىن جاپپايدى.
ال قارجى ليزينگى ۇزاق مەرزىمگە بەرىلەدى جانە كەيىن كولىكتى ساتىپ الۋ مىندەتىن قامتيدى. بۇل جاعدايدا تولەمدەرگە كولىكتىڭ تولىق باعاسى مەن ليزينگ بەرۋشىنىڭ سىياقىسى كىرەدى. سونىمەن قاتار، ساقتاندىرۋ، تەحنيكالىق قىزمەت كورسەتۋ، كولىك سالىعى سياقتى قوسىمشا شىعىنداردى دا كليەنت تولەيدى.
ايگەرىم ءىلياسوۆا قازاقستاندا ليزينگ نارىعى 2000 جىلدان بەرى جۇمىس ىستەپ كەلە جاتقانىن، الايدا بۇرىن مۇنداي قىزمەتتى نەگىزىنەن زاڭدى تۇلعالار مەن كاسىپكەرلەر پايدالانعانىن ايتتى.
ونىڭ پىكىرىنشە، حالىق وپەراسيالىق ليزينگتى كۇتتى. الايدا مۇنداي جۇيە جۇمىس ىستەۋى ءۇشىن پايدالانىلعان كولىكتەردى قايتا وتكىزۋ نارىعى دامىعان بولۋى كەرەك. ياعني كولىك پروكاتى، قايتا ليزينگكە بەرۋ نەمەسە ەسكى كولىكتەر اۋكسيونى سياقتى جۇيەلەر قالىپتاسۋى قاجەت.
قازاقستاندا ليزينگ كومپانيالارى ازىرگە تەك قارجى ليزينگىن ۇسىنا الادى. سوندىقتان ۇسىنىلعان اۆتوليزينگ ءىس جۇزىندە اۆتونەسيەگە ۇقساس ونىمگە اينالدى، تەك كولىكتىڭ مەنشىك قۇقىعى بىردەن بەرىلمەيدى. سونىڭ سالدارىنان وعان سۇرانىس جوعارى بولمادى.
ساراپشى مۇنداي جاعدايدا اۆتوليزينگتىڭ باستى ارتىقشىلىعى ونىڭ ارزان بولۋى قاجەت ەكەنىن ايتتى. الايدا ليزينگ كومپانيالارى قاراجاتتى بانكتەردەن الاتىندىقتان، ونىڭ قۇنى اۆتونەسيەدەن تومەن بولمادى.
ليزينگ تولەمدەرىن ازايتۋ ءۇشىن جەڭىلدەتىلگەن قارجىلاندىرۋ ءبولۋ، سىياقى مولشەرلەمەسىن سۋبسيديالاۋ نەمەسە ليزينگ تولەمدەرىن سالىقتان بوساتۋ سياقتى شارالار قاجەت. ءبىراق مۇنداي باستامالارعا قوسىمشا بيۋدجەت قارجىسى كەرەك.
