Qazannyń alǵashqy jeksenbisine tuspa-tus kelgen ustazdardyń aishyqty merekesi olardyń mereiin ústem eteri sózsiz.
Búginde muǵalimder qaýymy olar súiregen bilim atty kemeniń baǵyty qashanda bilik nazarynda.
Oǵan dálel, el aýmaǵynda mekteptiń materialdyq-tehnikalyq bazasynyń jyl saiyn jańartylyp, odan qalsa jańa bilim ordalarynyń boi kóterýi. Máselen, tek Almaty oblysynda ǵana aǵymdaǵy jyly 32 bilim berý nysanynyń qurylysy júrgizildi. Onyń ishinde úsh aýysymdy oqytýdy joiý úshin 17 mekteptiń salynýy bilim salasyna aýdarylǵan nazardyń basymdyǵyn kórsetpei me? Qala berdi dál biylǵy jyly oblysta 55 bilim berý nysany kúrdeli jóndeýden ótken. Bul maqsatqa qazynadan 23,9 mlrd teńge qarjy qarastyrylǵan.
Nysannyń jańarǵany, jarqyn bolashaq ieleriniń sapaly bilim alýyna yqpal eteri sózsiz. Sońǵy toǵyz aidaǵy esep boiynsha Almaty oblysynda 1181 mektepke deiingi mekeme jumys jasasa, atalǵan nysan qabyrǵasynda 87318 bala tárbielenýde.
Dál osyndai búldirshinderdi oblys boiynsha 41 625 pedagog bilim nárimen sýsyndatyp otyr.
Mereke qarsańynda barlyq oblys aýmaǵyndaǵy muǵalimder qaýymy eleýsiz qalmaityny anyq. Solardyń ishindegi bir parasyn óńir basshysy Amandyq Batalov saltanatty sharada arnaiy quttyqtady.
– Tuńǵysh Prezidentimizdiń bastamasymen 2019 jyly «Pedagog mártebesi týraly» zań qabyldanyp, memleket basshysy Qasym-Jomart Toqaevtyń Halyqqa Joldaýynda muǵalimderdiń dárejesin kóterip, jaǵdaiyn jaqsartýǵa erekshe mán berildi. Rasynda, ustaz – uly mamandyq. Urpaq boiyna bilim nárin quiǵan eńbekterińiz orasan. Sizderge shyǵarmashylyq tabys tileimin. Barshańyzdy kásibi merekelerińizben shyn júrekten quttyqtaimyn, – dedi oblys ákimi Amandyq Ǵabbasuly óz sózinde.
Jiyn barysynda eńbegimen elengen bir top ustazdar qaýymy laiyqty marapattaryn aldy. Mereke kúni mereileri artqan ustazdar qatarynda Taldyqorǵan qalasy № 22 orta mektep muǵalimi Rahilia Aqsholaqova, Almaty oblystyq bilim berýdi damytý oqý-ádistemelik ortalyǵynyń direktory Alýa Qabdýlova, Q.Baiseiitov atyndaǵy Taldyqorǵan saz kolledjiniń arnaiy pán oqytýshysy Kamil Naǵimetýllauly, Sarqan politehnikalyq kolledji direktorynyń óndiristik oqytý jumysy jónindegi orynbasary Baýyrjan Tobyshaqovta bar. Olar Qazaqstan Respýblikasy Bilim jáne ǵylym ministrliginiń «Y. Altynsarin» tósbelgisin keýdelerine taqty.
Odan ózge, «Úzdik aýyl mektebi» nominatsiiasynyń jeńimpazy Qarasai aýdany, Almalybaq aýylyndaǵy orta mektep-gimnaziiasy direktory – Sáýle Mahambetova atansa, «Úzdik kásiptik bilim berý uiymy» nominatsiiasy boiynsha, Jambyl atyndaǵy Uzynaǵash kásiptik kolledji direktory – Bolat Altaev jeńimpaz dep tanyldy.
Al «Úzdik synyp jetekshisi» atalymynda oq boiy ozǵan Alakól aýdany Úsharal №1 orta mekteptiń muǵalimi, Aigúl Ahmetova boldy. Barsha jeńimpazdarǵa I dárejeli diplom jáne 500 myń teńge tabystaldy.
Ustazdar ulaǵatyn sarapqa salatyn oblysymyzdyń «Jyldyń úzdik muǵalimi» atalymynda Aqsý aýdany, Ǵani Muratbaev atyndaǵy orta mekteptiń matematika páni muǵalimi Asyl Qaimuhanov jeńip shyqty. Úzdik atanǵan ustaz temir tulpar mindi.
Osylaisha, eliniń órkendeýine shákirt tárbieleý arqyly úles qosyp júrgen jandar laiyqty marapatqa ie boldy.
– Bul etken eńbektiń jemisi degen oidamyn. Óte qýanyshtymyn. Sózben aityp jetkizý múmkin emes. Aldaǵy tańda budan da jaqsy nátijege qol jetkizemiz. Ár ustaz óz mamandyǵyn jaqsy kórýi kerek. Men óz shákirtterimniń ómirden oryndaryn tabýǵa kómekteskim keledi. Ustazdaǵy basty qasiet aldyndaǵy oqýshyǵa degen sheksiz meiirim degen oidamyn. Biz asa úlken yqylaspen shákirt tárbieleý isinde jaýapkershilik tanytý kerekpiz, – dedi «Jyldyń úzdik muǵalimi» Asyl Qaimuhanov.
«Alty Alashtyń igi jaqsysy bas qossa, tórdegi oryn ustazdiki» degen Maǵjan Jumabaevtiń oramdy sózinen-aq ustazdardyń qashanda qadirli jan ekenin ańǵarý qiyn emes.
Qoǵamnyń ár salasynyń tizginin ustaǵan ziialy qaýym da, aidy baǵyndyrǵan adamda, eldi aýzyna qaratqan dana da ustaz atty ulaǵatty tulǵadan tálim aldy.
Jastardyń jalynatýy da osy bir qasterli jandarǵa tikelei bailanysty. K.D.Ýshinskii aitqandai «muǵalim isi syrttai qarapaiym bolǵanmen – tarihtaǵy eń uly istiń biri». Tarihtyń san paraǵyna qaitalanbas qoltańbalaryn shákirtteri arqyly qaldyratyn qaýymnyń eńbekteri eren.
Anar SABYROVA, Almaty oblysy.
