Soltústiktegi kórshimiz Resei Qazaqstannan úlgi alyp, 2015 jyldan bastap 12 jyldyq bilim júiesine kóshe bastaǵan bolatyn. O basta Qazaqstannyń is-tájiribesin joǵary baǵalaǵan orystar bizdiń ádistemelik baǵdarlamalarmen tanysyp, ustazdarmen tájiribe almasqan bolatyn. Jýyrda men Máskeý memlekettik pedagogikalyq ýniversitetiniń arnaiy shaqyrýymen osy oqý ornyndaǵy biologiia fakýltetiniń uiymdastyrýymen ótken halyqaralyq konferentsiiaǵa qatystym. 12 jyldyq bilim júiesine aýysý jolynda birshama tájiribe jinaǵan memlekettik mamany retinde Qazaqstan atynan mundai mańyzdy basqosýǵa qatysyp, kókeige túigen oilarymdy ortaǵa salý meniń elimizdegi bilim berý júiesiniń qandai deńgeige kóterilgenin kórsetip bergendei boldy.
Máskeýde ótken dál osy jiynnyń aldynda Abai atyndaǵy QazUPÝ-de ótken onlain-seminarǵa máskeýlik professor, pedagogika ǵylymdarynyń doktory Nikolai Bogdanovpen oi bólisip, 12 jyldyq bilim berý júiesine qatysty biraz máselelerdi biraz talqylaǵan edik. Keiinnen Nikolai Aleksandrovich meni Máskeý memlekettik pedagogikalyq ýniversiteti uiymdastyrǵan onlain-seminarǵa qatysyp 12 jyldyq bilim berý júiesine qatysty oiymdy ortaǵa salýdy usynǵannan keiin, men reseilik áriptesimniń usynysyna qýana kelistim.
Biologiia, himiia jáne jaratylystaný siiaqty negizig pánder boiynsha sabaq beretin ustazdar bas qosqan bul seminar barysynda máskeýlik mamandar 12 jyldyń bilim berý júiesindegi Qazaqstannyń is-tájiribesine tereńirek úńilgisi keletinin alǵa tartty. Onyń ishinde 12 jyldyq bilimdegi bastaýysh synyptarǵa arnalǵan baǵdarlamalardyń da mańyzyn túsinýge tyrysty.
Seminarda kóptegen ustaz-ǵalymdar sóz sóilep, qazirgi tańda Reseide 12 jyldyq bilim berý júiesi boiynsha biologiia páni boiynsha bilim baǵdarlamalaryn Qazaqstannyń tájiribesine súienip, jetildire túsý kerek ekenin alǵa tartty. Bir baiqaǵanym, Reseide oqý standarttary bar bolǵanymen, onyń naqty mazmuny men tájiribesi qalyptaspaǵanyna kóz jetkizdim.
Onlain basqosýda usynǵan baiandamamnyń taqyryby «Jaratylystaný. Adam jáne qoǵam páni boiynsha bilim berýdi kútiletin nátijege baǵyttaý» dep ataldy. Qazaqstannyń 12 jyldyq bilim berý isine kóshýde baǵdarlamalardaǵy bólingen saǵattardyń mazmuny men baǵyty TMD elderindegi ustazdardy qatty qyzyqtyrdy. Qazirgi tańda bilim deńgeii alǵan bilimniń kólemimen anyqtalmaidy, sol bilimniń negizinde ártúrli máselelerdi sheshe alý qabiletterimen ólshenedi. Basqasha aitqanda, tulǵaǵa baǵdarlanǵan is-árekettik tásil – bilimniń máni men mańyzyn joqqa shyǵarmaidy, ol oqýshylardyń alǵan bilimdi paidalana alýy qabiletterine kóńil aýdarýǵa basymdyq beriledi.
Kezdesýde áriptesterimiz bizdiń mamandandyrylǵan mektebimizge qatysty kóptegen suraqtar qoidy. Bizdiń mektep standart boiynsha beriletin jalpy bilimmen qatar mýzykalyq mektep bolyp tabylady. Mundai daryndy balalarǵa arnalǵan tereńdetilgen, mamandandyrylǵan mýzykalyq mektep-internat balalardy oqytýda jalpy bilim men arnaiy bilimniń eki jaǵyn birdei qamtidy.
Gúlbarshyn JAKIShEVA, A.Jubanov atyndaǵy Daryndy balalarǵa arnalǵan respýblikalyq mýzykalyq mektep-internattyń ustazy.
