Prezidenttiń tapsyrmasynyń aiasynda qolǵa alynǵan «Jaily mektep» ulttyq jobasy – elimizdiń bilim berý infraqurylymyn jańǵyrtýǵa baǵyttalǵan mańyzdy qadam. Joba aiasynda oqýshylarǵa qaýipsiz, yńǵaily jáne zamanaýi bilim alý jaǵdailaryn jasaý kózdelgen. Shyǵys Qazaqstan oblysynda osy joba sheńberinde jalpy syiymdylyǵy 3 myń oryndy quraityn jeti jańa mekteptiń qurylysy josparlanǵan bolatyn.
– Bul bastamanyń maqsaty – bilim sapasyn arttyrýmen qatar, oqýshylar men muǵalimder úshin jaily orta qalyptastyrý. Ótken jyldyń sońyna qarai jospar boiynsha Shemonaiha, Ridder, Óskemen qalalarynda (Ýáliev jáne Timofeev kóshelerinde), sondai-aq Glýbokoe aýdanynyń Beloýsovka kentinde ornalasqan 2100 oryndyq bes mekteptiń qurylysy tolyǵymen aiaqtaldy. Salynǵan mektepterdi jergilikti atqarýshy organnyń balansyna qabyldaý úshin arnaiy qabyldaý komissiiasy qurylyp, tiisti tekserýler júrgizilýde.
900 orynǵa eseptelgen eki mektep, iaǵni Óskemendegi Esenberlin dańǵyly boiynda jáne Glýbokoe aýdanyndaǵy Opytnoe pole aýylynda ornalasqan mektepter byltyrdan bastap ótpeli jobalar qataryna engen. Olardyń qurylysyn osy jyldyń tamyzynda aiaqtaý josparlanǵan. Qazirgi ýaqytta Esenberlin dańǵylyndaǵy mektep qurylysynyń 52%-y, Opytnoe pole aýylyndaǵy mektep qurylysynyń 69%-y oryndalǵan, – deidi oblys ákiminiń orynbasary Erbol Nurǵaliev.
Bul joba aiasynda salynǵan mektepter arhitektýralyq jáne fýnktsionaldyq sheshimderimen erekshelenedi. Jaily mektepterdiń aýdany standartty mektepterge qaraǵanda keńirek, al zamanaýi tehnologiialyq qural-jabdyqtar eki ese kóp ornatylǵan. Árbir mektep zamanaýi tehnologiialardy qamti otyryp, erekshe bilim berýdi qajet etetin balalarǵa qoljetimdi bolýy jáne ártúrli bilim berý keńistikterin usynýy úshin arnaiy jobalanǵan.
Úsh mektep oqýshy oryndarynyń tapshylyǵy máselesin sheshý maqsatynda salyndy (Óskemendegi №31, №40 mektepter jáne №2 Beloýsovka mektebi), 2 mektep eski ǵimarattardyń ornyna salyndy (Ridderdegi №12 mektep, Shemonaiha aýdanynyń Shákárim atyndaǵy №4 mektebi).
Ár mektepte arnaiy jabdyqtalǵan oqý kabinetteri, óner jáne jaratylystaný ǵylymdary baǵytyndaǵy aýditoriialar, zamanaýi sport zaldary men ashyq alańdar qarastyrylǵan.
Jaily mektepter tiptik mektepke qaraǵanda aýdany úlken jáne zamanaýi tehnologiialyq jabdyqtarmen eki ese jaqsy qamtamasyz etilgen. Barlyq synyptarda zamanaýi interaktivti taqtalar ornatylǵan. Mektepterde ozyq STEM-zerthanalar, robototehnika synyptary, zamanaýi úlken LED-ekrany bar akt zaly, kovorkingter, 600 oryndyq mektepter úshin bastaýysh jáne orta synyptarǵa arnalǵan jeke sport zaldary qarastyrylǵan.
Mektepter aýmaǵynda fýtbol alańy, júgirý joly, ámbebap sport alańy, oiyndar men workout jattyǵýlaryna arnalǵan aimaqtar, sondai-aq Alǵashqy áskeri daiyndyq pánine arnalǵan plats alańdary bar. Olar saptyq daiyndyq sabaqtaryn ótkizýge, áskeri tártip pen saptyq qozǵalys daǵdylaryn qalyptastyrýǵa múmkindik beredi.
Erekshe balalar úshin pandýstar, liftter, arnaiy kórsetkishter, jeke keń dárethanalar jáne inkliýzivti synyptar jabdyqtalǵan. Mektep zamanaýi beinebaqylaý jáne ozyq órtke qarsy júiemen qamtylǵan.
Jergilikti atqarýshy organdar tarapynan ár oqý mekemesi qaýipsiz kireberis joldar, avtoturaqtar, jaryqtandyrylǵan jaiaý júrginshiler joly jáne ótkeldermen qamtamasyz etilgen.
