Almaty qalasy polısıa departamenti basshysynyń burynǵy orynbasary Erjan Uzabaevqa qatysty birqatar kúmándi derekter aıtyldy, dep habarlaıdy Dalanews.kz.
Bul týraly Dissident YouTube arnasynda jarıalanǵan vıdeoda málim boldy.
Arna avtorlarynyń aıtýynsha, eks-polıseı Almaly aýdanynda arnaıy batalóndy basqarǵan kezde jalǵan jol-kólik oqıǵalaryn tirkep, sol arqyly saqtandyrý tólemderin alyp otyrǵan.
“Olar lúks sanatyndaǵy kólikterge qatysty jalǵan jol apattaryn rásimdep, saqtandyrý kompanıalary arqyly iri kólemde qarajat shyǵaryp otyrǵan”, – deıdi derekkóz.
Vıdeoda aıtylǵan málimetke sáıkes, mundaı áreketter tek Almaty qalasymen shektelmeı, Jambyl jáne Almaty oblystarynda da bolýy múmkin. Atap aıtqanda, júk tıelgen fýralar “órtendi” degen jalǵan qujattar rásimdelip, saqtandyrý tólemderi alynǵany aıtylǵan.
Derekkózdiń málimetinshe, bul shema birneshe jyl boıy júıeli túrde júzege asyrylyp kelgen.
Sonymen qatar avtor eks-polıseıge tıesili bolýy múmkin múlik týraly da málimet keltiredi. Olardyń aıtýynsha, Jambyl oblysy Otar mańyndaǵy iri sharýashylyq resmı túrde týysynyń atyna tirkelgenimen, is júzinde onyń ózine tıesili bolýy ǵajap emes.
“Bul múlik zańsyz jolmen alynǵan bolýy múmkin”, – deıdi vıdeo avtory.
Budan bólek, birqatar qymbat avtokólikter men bıznes nysandary da onyń týystarynyń atyna rásimdelgeni aıtylǵan.
Sondaı-aq vıdeoda atalǵan tulǵamen baılanysy bar delingen birneshe adamnyń esimi keltirilip, olardyń keıbiri buryn quqyq qorǵaý organdarynda qyzmet atqarǵany jáne túrli daýlarǵa qatysty bolǵany atalyp ótken.
Avtorlardyń pikirinshe, bul jaǵdaılar uıymdasqan qylmystyq top belgilerine uqsaıdy.
Osyǵan baılanysty olar İshki ister mınıstrligine, sondaı-aq ózge de quqyq qorǵaý organdaryna úndeý jasap, atalǵan derekterdi tekserýdi suraǵan.
“Eger bul málimetter tekserilmese, onda quqyqtyq memleket qaǵıdalaryna kúmán týyndaıdy”, – delingen vıdeoda.
Aıta keteıik, buǵan deıin Ál-Farabı dańǵylyndaǵy adam ólimine ákelgen jol apatynan keıin qalalyq polısıada kadrlyq ózgerister bastalǵany týraly jazǵan edik.
Beıresmı derekterge súıensek, Almaty qalalyq polısıa departamenti basshysynyń orynbasary Erjan Uzabaev eńbekke jaramsyz dep, ýaqytsha demalysqa ketken. Onyń qyzmetten bosatylýy da múmkin ekeni aıtylýda.
Sondaı-aq, ákimshilik polısıa basqarmasynyń bastyǵy Serik Shýmaev qyzmetinen ketkeni belgili boldy. Budan bólek, arnaıy batalónnyń úsh vzvod komandıri jáne patrúldik polısıa polkiniń bir rota komandıri de laýazymynan aıyrylǵan.
Eske salaıyq, buǵan deıin zańger Moldahan Ádilethan ál-Farabı dańǵylyndaǵy qaıǵyly jol apatynyń mán-jaıyn jarıalap, jarysqa qatysy bolýy múmkin tulǵalar arasynda joǵary laýazymdy polısıa qyzmetkeriniń aty atalǵan bolatyn.
Resmı organdar ázirge bul kadrlyq ózgeristerge qatysty tolyq túsinikteme bergen joq. Alaıda oqıǵa qoǵamda úlken rezonans týdyryp, quqyq qorǵaý júıesine qatysty suraqtardy kúsheıtti.
Qazirgi ýaqytta apat boıynsha tekserý amaldary jalǵasyp jatyr.
