"Qazaqmys korporatsiiasy" JShS Basqarma tóraǵasynyń óndiris jónindegi orynbasary Saiat Bakirov jumys saparymen "Jomart" kenishine bardy, dep habarlaidy Dalanews.kz.
Sapar barysynda óndiristik jáne infraqurylymdyq máseleler qaralyp, taý-ken-kapitaldyq, úńgileý jáne ken óndirý jumystarynyń barysy talqylandy. 
Ken qoryn ashý jáne daiyndaý boiynsha oń nátije baiqalýda. Eki aida shamamen 600 qýma metr ashý jáne 1400-ge jýyq daiyndaý qazba jumysy júrgizildi. 2026 jylǵy birinshi jartyjyldyqtyń sońyna qarai ashylǵan jáne daiyndalǵan qor kólemi artady dep kútilýde.
Kenishtegi aerogazdyq jaǵdaidy baqylaýǵa erekshe kóńil bólinýde. 2026 jyly bul maqsatqa 925 mln teńge qarjy bólindi.
Ónerkásiptik qaýipsizdikti kúsheitý aiasynda ózdiginen júretin tehnika metan-relemen jabdyqtalýda. Ol gazdyń mólsheri ruqsat etilgen deńgeiden asqan jaǵdaida qozǵaltqyshty avtomatty túrde óshiredi. Búgingi tańda mundai júiemen bes tehnika birligi jabdyqtaldy, on bir tehnika kezekte tur.
Sonymen qosa aerogazdyq jaǵdaidy baqylaýǵa arnalǵan statsionarlyq datchikter engizilýde. Qaýipti kórsetkish anyqtalǵan jaǵdaida ol energiia jabdyǵyn avtomatty túrde óshiredi. Búginge deiin bes datchik ornatyldy, jospar boiynsha taǵy jeti datchik ornatylady.
Kenishti damytýǵa salynǵan investitsiianyń jalpy kólemi 2,7 mlrd teńgeden asady. Qarajat №3 jeldetý oqpanyn tereńdetýge jumsalady. Joba aiasynda oqpandy arqaýlaý, sondai-aq negizgi jeldetý qondyrǵysyn ornatyp, paidalanýǵa berý qarastyrylǵan.
№1 jáne №2 negizgi jeldetý qondyrǵylaryna kúrdeli jóndeý júrgizilip, olar jobalyq qýatqa shyǵaryldy. Bul shahtaǵa qosymsha 200 tekshe metrge deiin taza aýa jetkizýge múmkindik beredi.
Jeldetýdi jaqsartý maqsatynda diametri 2,5 metr bolatyn eki jeldetý shýrfy qazylyp, 156 metr tereńdikke aýa berý qamtamasyz etildi. Batys jáne shyǵys qaptaldarda diametri 4,5 metr bolatyn taǵy eki shýrf qazý josparlanýda. Olar 600 metrge deiingi tereńdikke aýa jetkizýdi qamtamasyz etedi.
Sonymen qatar "SoiýzGeoMeh" JShS-men mamandardy oqytý jáne kompaniia kenishterine geomehanika boiynsha zamanaýi standart engizýdi kózdeitin yntymaqtastyq máselesi qarastyrylýda.
