Qazaqstannyń birqatar óńirinde kóktemgi sý tasqyny jalǵasyp jatyr. Aqmola oblysynda pontondy kópirdi sý bassa, Soltústik Qazaqstan oblysynda erigen qar sýy joldy shaiyp ketken, dep habarlaidy Dalanews.kz.
Tótenshe jaǵdailar ministrliginiń málimetinshe, Aqmola oblysy Zerendi aýdanyndaǵy Shaǵalaly ózeninde ornalasqan pontondy kópirdiń ústinen sý asyp ketken. Bul kópir aýyldyń negizgi bóligin 28 úi ornalasqan kóshemen bailanystyryp tur.
Vedomstvonyń habarlaýynsha, balama jol bolǵanyna qaramastan, jergilikti turǵyndar men atqarýshy organdardyń ótinishi negizinde ótkel uiymdastyrylǵan. Qutqarýshylar qaiyqpen 16 adamdy tasymaldap, turǵyndardyń úilerine jetýine jáne azyq-túlik alýyna jaǵdai jasaǵan.
Qazirgi ýaqytta kópirdiń tehnikalyq jaǵdaiy qalypty, sý deńgeii birtindep tómendep keledi. Oqiǵa ornynda ákimdik, tótenshe jaǵdailar qyzmeti men politsiia qyzmetkerleri kezekshilik atqarýda.
Al Soltústik Qazaqstan oblysynyń Aqjar aýdanynda erigen qar sýynyń kúrt kóterilýine bailanysty Leningrad – Aisary baǵytyndaǵy aýdandyq mańyzy bar avtojoldyń bir bóligi shaiylyp ketken.
Jergilikti bilik ókilderiniń málimdeýinshe, sýdyń erkin ótýin qamtamasyz etý úshin jol jabynyn arnaiy túrde buzý týraly sheshim qabyldanǵan. Bul shara yqtimal qaýiptiń aldyn alý maqsatynda jasalǵan.
Qazirgi tańda sý deńgeii tómendegen. Mamandar joldy qalpyna keltirý jumystaryn júrgizip jatyr. Aýdan ákimdigi men jol qyzmeti táýlik boiy kezekshilik uiymdastyrǵan. Jaǵdai turaqty baqylaýda.
