2026 jyly «QazAvtoJol» ulttyq kompaniiasy aqyly joldardan shamamen 97–100 mlrd teńge jinaýdy josparlap otyr. Bul týraly basqarma tóraǵasy Darhan Imanashev málimdedi, dep habarlaidy Dalanews.kz.
Onyń aitýynsha, túsken qarjynyń 30 paiyzy joldardy kútip-ustaýǵa baǵyttalady. Taǵy 10 paiyzy arnaiy tehnika men beinebaqylaý kameralaryn satyp alýǵa jumsalady.
Sońǵy eki jylda kompaniia 1200 dana tehnika satyp alǵan. Aldaǵy ýaqytta taǵy 800 tehnika alý josparlanyp otyr. Jalpy qajettilik shamamen 2000 birlik.
Sonymen qatar, joldardyń sapasyna bailanysty «QazAvtoJolǵa» qarsy sotqa júgingender de bar. Qazirgi ýaqytta jeti qazaqstandyq kólikteri zaqymdanǵanyn aityp, ótemaqy talap etip otyr.
Darhan Imanashevtiń sózinshe, talapkerler kóliktiń júris bóligi buzylyp, dóńgelekteri jarylǵanyn alǵa tartqan. Alaida kompaniia tek sot sheshimi shyqqan jaǵdaida ǵana shyǵyndy óteýge daiyn ekenin málimdedi.
Aita keterligi, kompaniianyń resmi derekterinde jol sapasyna bailanysty birde-bir jol-kólik oqiǵasy tirkelmegen. Vedomstvonyń nusqasyna sáikes, apattar basqa sebepterden bolady.
