2026 جىلى «قازاۆتوجول» ۇلتتىق كومپانياسى اقىلى جولداردان شامامەن 97–100 ملرد تەڭگە جيناۋدى جوسپارلاپ وتىر. بۇل تۋرالى باسقارما ءتوراعاسى دارحان يماناشيەۆ مالىمدەدى، دەپ حابارلايدى Dalanews.kz.

ونىڭ ايتۋىنشا، تۇسكەن قارجىنىڭ 30 پايىزى جولداردى كۇتىپ-ۇستاۋعا باعىتتالادى. تاعى 10 پايىزى ارنايى تەحنيكا مەن بەينەباقىلاۋ كامەرالارىن ساتىپ الۋعا جۇمسالادى.

سوڭعى ەكى جىلدا كومپانيا 1200 دانا تەحنيكا ساتىپ العان. الداعى ۋاقىتتا تاعى 800 تەحنيكا الۋ جوسپارلانىپ وتىر. جالپى قاجەتتىلىك شامامەن 2000 بىرلىك.

سونىمەن قاتار، جولداردىڭ ساپاسىنا بايلانىستى «قازاۆتوجولعا» قارسى سوتقا جۇگىنگەندەر دە بار. قازىرگى ۋاقىتتا جەتى قازاقستاندىق كولىكتەرى زاقىمدانعانىن ايتىپ، وتەماقى تالاپ ەتىپ وتىر.

دارحان يماناشيەۆتىڭ سوزىنشە، تالاپكەرلەر كولىكتىڭ ءجۇرىس بولىگى بۇزىلىپ، دوڭگەلەكتەرى جارىلعانىن العا تارتقان. الايدا كومپانيا تەك سوت شەشىمى شىققان جاعدايدا عانا شىعىندى وتەۋگە دايىن ەكەنىن مالىمدەدى.

ايتا كەتەرلىگى، كومپانيانىڭ رەسمي دەرەكتەرىندە جول ساپاسىنا بايلانىستى بىردە-بىر جول-كولىك وقيعاسى تىركەلمەگەن. ۆەدومستۆونىڭ نۇسقاسىنا سايكەس، اپاتتار باسقا سەبەپتەردەن بولادى.