Májilis depýtaty Edil Janbyrshinge qatysty qozǵalǵan azamattyq is boiynsha sot sheshim shyǵardy. Daýly jaǵdai byltyr tamyz aiynda depýtattyń áleýmettik jelidegi pikirinen keiin týyndaǵan edi, dep habarlaidy Dalanews.kz.
Tengrinews.kz málimetinshe, sot talap qoiýshy Vitalii Shevchenkonyń aryzyn qanaǵattandyrmady. Iaǵni, depýtattyń jariialaǵan sózderi qorlaý nemese ar-namysqa nuqsan keltirý dep tanylmady. Sondyqtan odan kópshilik aldynda keshirim suratý týraly talap ta negizsiz dep sheshildi.
Sýdia Aigúl Aiapbergenovanyń aitýynsha, saraptama qorytyndysynda depýtattyń sózderinen naqty derekke negizdelgen, bedelge nuqsan keltiretin málimetter anyqtalmaǵan.
"Bul pikirler baǵalaý sipatyndaǵy tujyrym bolyp sanalady", – dedi ol.
Sondai-aq sot sheshimimen talap qoiýshy saraptama shyǵyndaryn óteýge mindetteldi. Bul soma 131 403 teńgeni quraidy.
Sot ókilderi bul iste tek zań talaptarynyń saqtalýyn qarastyrǵanyn atap ótti. Al depýtattyń sóziniń etikaǵa sáikestigin baǵalaý sot quzyretine kirmeidi. Mundai máseleler tiisti organdar men Parlament deńgeiinde qaralýy tiis.
Belsendi depýtatty ne úshin sotqa berdi?
Buǵan deiin LGBT quqyqtaryn qorǵaýmen ainalysatyn belsendi Vitalii Shevchenko depýtattyń áleýmettik jelide aitqan sózi ar-namysy men qadir-qasietine, sondai-aq iskerlik bedeline nuqsan keltirgenin alǵa tartqan edi.
Shevchenkonyń túsindirýinshe, daý depýtatpen áleýmettik jelidegi pikirtalas barysynda týyndaǵan. Ol bul talqylaýda gomofobiia saldarynan mektep jasynda kórgen býlling tájiribesi týraly jazǵan. Alaida depýtat oǵan “ne kýkarekat” dep jaýap bergen.
Belsendiniń pikirinshe, bul tirkes LGBT ókiline qatysty qoldanylǵan jaǵdaida qorlaityn, kemsitýshi jáne gomofobiialyq sipatqa ie, sebebi ol belgili bir áleýmettik kontekste adamnyń qadir-qasietin tómendetýge baǵyttalǵan.
“Men eshkimdi balaǵattaǵan joqpyn, arandatqan da emespin. Tek óz ómirimde bastan ótkergen jaittardy aittym. Al maǵan jaýap retinde qorlaityn sóz qoldanyldy”, - deidi Vitalii Shevchenko.
Onyń aitýynsha, bul jaǵdai tek jeke daý emes, jariia tulǵalardyń sóz jaýapkershiligine qatysty másele. Shevchenko memlekettik qyzmette júrgen adamnyń mundai sóz aitýy qoǵamda kemsitýshilikti kúsheitýi múmkin dep esepteidi.
Osyǵan bailanysty ol sottan depýtattyń málimdemesin ar-namysyna tietin, qorlaityn dep tanýdy jáne kópshilik aldynda keshirim suraýdy talap etpek.
Májilistiń ustanymy jáne sotqa deiingi kezeń
Sotqa júginer aldynda Vitalii Shevchenko Májiliske resmi shaǵym túsirgen. Alaida jaýapta depýtattyń áreketteri úshin jaýapkershilikke tartýǵa negiz joq ekeni kórsetilgen. Májilis depýtattyń málimdemesin jeke kózqaras retinde baǵalaǵan.
Sonymen birge Májilis tóraǵasynyń janyndaǵy depýtattyq etika jónindegi keńestiń tóraǵasy Baqytqoja Izmuhambetov ótinish iesine bul sheshimmen kelispegen jaǵdaida sotqa júginýge bolatynyn habarlaǵan.
Osydan keiin Shevchenko Astananyń azamattyq ister jónindegi aýdanaralyq sotyna talap-aryz bergen.
