Bıyldan bastap 1-synypqa qujat qabyldaý merzimi ózgerdi. Endi ótinishter ádettegideı 1 sáýirden emes, 27 mamyrdan bastap qabyldanady. Bul týraly Oqý-aǵartý mınıstri Juldyz Súleımenova málimdedi, dep habarlaıdy Dalanews.kz.

Mınıstr atalǵan sheshim mektepterdegi oqý prosesine kedergi keltirmeý úshin qabyldanǵanyn jetkizdi.

Onyń túsindirýinshe, buryn qujat qabyldaý kezeńi sabaq ýaqytymen tuspa-tus kelip, mektep ákimshiligi men muǵalimderge qosymsha júkteme túsiretin.

"Qujat qabyldaý 1 sáýirden bastalǵan kezde ol mektepterdegi sabaq prosesimen qabattasatyn. Bul ýaqytta mektep basshylyǵy da, muǵalimderi de, İT mamandary da oqý prosesimen qarbalasyp júredi. Sonyń saldarynan birinshi synypqa qujat qabyldaýdy tıimdi uıymdastyrý qıynǵa soǵatyn. Sondyqtan osyndaı jaǵdaılardyń aldyn alý úshin merzimdi qaıta qarastyrdyq", – dedi mınıstr.

Aıta keteıik, qujattardy 31 tamyzǵa deıin tapsyrýǵa bolady.