Astanada qyz balalardy tehnologiia salasyna tartýǵa baǵyttalǵan RoboTechnoGirls 2025 bilim berý jobasy iske qosyldy,- dep habarlaidy Dalanews.kz
Joba qyz balalarǵa qazirgi zamanǵy injenerlik jáne tehnologiialyq bilimge teń qoljetimdilikti qamtamasyz etýge, sondai-aq olardyń ǵylym, tehnologiia, injeneriia jáne matematika salalaryna (STEM) degen turaqty qyzyǵýshylyǵyn qalyptastyrýǵa jáne tehnikalyq mamandyqtardaǵy genderlik kedergilerdi jeńýge járdemdesýge baǵyttalǵan.
Kýrstardy «Robotek» robototehnika mektebi uiymdastyryp otyr. Jobaǵa TechnoWomen kommertsiialyq emes uiymy men «Astana daryny» daryndy balalardy anyqtaý jáne qoldaý ortalyǵy qoldaý kórsetýde.
Jobanyń saltanatty ashylýyna «Astana daryny» ortalyǵynyń basshysy Janar Beisenbaeva, TechnoWomen qaýymdastyǵynyń prezidenti jáne teń quryltaishysy Áziza Shójeeva, «Robotek» mektebiniń bas direktory ári negizin qalaýshy Sanjar Shalqarbekov, sondai-aq mekteptiń operatsiialyq direktory Diana Dúisenova qatysty.
«Bul joba dástúrge ainalyp úlgerdi jáne biyl qatarynan ekinshi ret ótkizilýde. Ótken jyly biz 100 qyzdy sátti oqytyp shyǵardyq. Biyl da shamamen 100 qatysýshy kýrsqa qatysýǵa niet bildirdi. Qyzdar robototehnika men jasandy intellekt pánderinen sabaq oqidy. Joba aiasynda túrli sharalar josparlanǵan: hakaton, respýblikalyq jáne qalalyq olimpiadalar, jasandy intellekt qoldanýǵa arnalǵan baiqaýlar uiymdastyrylady. Bul – tehnologiia salasyndaǵy basty trendterdiń biri. Bul – qyz balalardyń tehnologiiaǵa degen qyzyǵýshylyǵyn arttyryp, olardy ári qarai damýǵa shabyttandyratyn jyl saiynǵy dástúrge ainalǵan joba, – dedi Janar Beisenbaeva.
Baǵdarlama 10-15 jas aralyǵyndaǵy qatysýshylarǵa arnalǵan jáne Astanadaǵy eki oqý ornynda oflain formatta ótkiziledi. Sabaqtar qazaq jáne orys tilderinde júrgiziledi.
Qyz balalar 6 apta boiy – 17 tamyzǵa deiin – robototehnika men jasandy intellekt negizderin, konstrýktorlarmen, sensorlarmen jáne qarapaiym algoritmdermen jumys isteýdi úirenedi. Baǵdarlamada jeke de, komandalyq tapsyrmalar da qarastyrylǵan. Kýrs sońynda qatysýshylar ózderiniń tehnikalyq jobalaryn tanystyrady.
Negizgi sabaqtardan bólek, mazmundy qosymsha baǵdarlama usynylǵan:
• eldegi startaptar men tsifrlyq sheshimderdiń eń iri tehnoparki Astana Hub-qa ekskýrsiia;
• STEM salasyndaǵy áiel mamandarmen motivatsiialyq kezdesýler (TechnoWomen qaýymdastyǵynyń qoldaýymen);
• shyǵarmashylyq pen logikalyq oilaýdy damytýǵa baǵyttalǵan injenerlik vorkshoptar men oiyndar.
«Jobaǵa qyzym - Aiym qatysyp jatyr. Biz bul robototehnika baǵdarlamasyna qyzyǵýshylyqpen qosyldyq. Ol týraly synyp jetekshisinen estip, birden qatysqymyz keldi. Búgin onyń alǵashqy sabaǵy. Biz onyń qandai áser alyp, qandai bilim jinaitynyn asyǵa kútip otyrmyz. Balalar erte jastan tehnologiia men baǵdarlamalaýmen tanysyp jatqany – óte mańyzdy. Bul – búgingi zaman talaby. Osyndai tamasha múmkindik úshin uiymdastyrýshylarǵa úlken raqmet! Ásirese, jobanyń tegin ekenine rizamyz. Bul – balalardyń tsifrlyq tehnologiialar álemine bastar joly, – dedi №102 mekteptiń 4-synyp oqýshysy Aiymnyń anasy Alýa Pernieva.
Kýrs sońynda barlyq qatysýshy alǵan bilimderi men daǵdylaryn rastaityn sertifikattarǵa ie bolady.
