Onyń aıtýynsha, quryltaı – bılik pen qoǵam arasyndaǵy ashyq dıalog ornatyp, naqty nátıjelerge jetýge múmkindik beretin mehanızm.

 

“Ulttyq quryltaı – bul jaı ǵana pikir almasý emes, qoǵamdaǵy ózekti máselelerdi anyqtap, olardy zań júzinde bekitýge jáne naqty iske asyrýǵa baǵyttalǵan alań. Bul format naqty nátıje berip otyr. Ótken jyly úshinshi quryltaı qorytyndysy boıynsha 10 zań jobasy daıyndaldy, onyń 9-yna Prezıdent qol qoıdy”, – dedi Aımaǵambetov.

 

Qabyldanǵan ózgerister:

•Qumar oıyn bıznesine shekteý engizildi, onyń ishinde jarnamaǵa tyıym salý jáne boryshkerler men memlekettik qyzmetkerlerdiń qatysýyna shekteý qoıý qarastyrylǵan.

•Tarıhı eskertkishter men tabıǵı nysandardy vandalızmnen qorǵaý sharalary kúsheıtildi.

•Ǵalymdar, ınjenerler, qurylysshylar men agrarshylarǵa qurmetti ataq berý júıesi keńeıtildi.

•Turmystyq zorlyq-zombylyq úshin qylmystyq jaýapkershilik engizilip, pedofılıa úshin ómir boıyna bas bostandyǵynan aıyrý jazasy bekitildi.

•“Aıbyn” ordenine Sáǵadat Nurmaǵambetov, Baýyrjan Momyshuly jáne Rahymjan Qoshqarbaevtyń esimderi berildi.

•Barlyq ataý ózgeristeri endi ortalyq organnyń maquldaýymen ǵana júzege asatyn boldy.

•Esirtki qylmysy úshin jaza qatańdatyldy, onyń ishinde esirtki saýdasyn uıymdastyrýshylar men qoldaýshylarǵa ómir boıyna bas bostandyǵynan aıyrý jazasy qarastyrylǵan.

 

Sonymen qatar, arheologıa salasyn reformalaý boıynsha jumystar jalǵasýda. Qazir lısenzıalaýdyń jańa standarttaryn engizý jáne zańsyz qazba jumystaryna qarsy sharalardy kúsheıtý baǵytynda zań jobasy qaralýda.

 

Aımaǵambetovtyń aıtýynsha, Ulttyq quryltaı – Prezıdenttiń “Halyq únine qulaq asatyn memleket” tujyrymdamasynyń bir bóligi. Quryltaıda kóterilgen usynystar qoǵamnyń naqty suranystaryna negizdelgendikten, olar zańnamalyq deńgeıde júzege asyrylyp, naqty ózgeristerge ákelýde.