"Qazatomónerkásiptiń" burynǵy basshysy Muhtar Jákishev jer asty bailyǵyn shikizat túrinde eksporttaýǵa túbegeili qarsy ekenin málimdep, ken túrlerin el ishinde óńdeý damýǵa serpin beretinin basa atap ótti, dep habarlaidy Dalanews.kz.
Muhtar Jákishev óz suqbatynda Qazaqstannyń jańa tehnologiialar óndirisi naryǵyna shikizat jetkizýde zor múmkindigi bar ekenin aitady. Sondyqtan ol jer asty bailyǵy, ásirese sirek kezdesetin metaldardy ken túrinde eksporttaýǵa tyiym salýdy talap etedi. Onyń ornyna zaýyttar salyp, bul metaldardy ózimizde óndirsek, birneshe ese paidaǵa keńeletinimizdi jetkizedi.
"Elektromobil óndirisine nikel aýadai qajet. Qazirgi qolda bary halyqaralyq korporatsiialarǵa jospardaǵy kólem úshin jetkilikti. Biraq aldaǵy bes jylǵa degen josparlarda bul shikizat túri tapshy. Sondyqtan bul naryqta Qazaqstannyń alar óz oryny ári úlken múmkindigi bar. Negizinen, sirek kezdesetin metaldar toptasyp, aralasyp birge júredi. Ony bir-birinen ajyratyp alý, árine, kúrdeli tehnologiialyq jáne ǵylymi negizdemeni qajet etedi. Ózge elderden bizdiń artyqshylyǵymyz da sol, ondai ken oryndary bizde jetip artylady. Sondyqtan tájiribe, zertteý júrgizýde bizde múmkindik óte zor. Osyny paidalanyp, biz nikeldi ajyratyp alý jolyn taptyq ta. Onda da kómirsýteginsiz óndirýdi. Eń bastysy, biz ony tómen baǵada da shyǵynsyz óndire alatyn tásilge súienemiz. Osy jaǵynan alǵanda, bizdiń básekege qabilettiligimiz bul rette joǵary. Sondyqtan zaýyttar salsaq, jetip jatyr. Onyń túk qiyndyǵy joq. Alaida qazir oǵan bas qatyryp jatqan eshkim joq. Mysaly, mysty rýda túrinde eksporttady delik. Al onymen qansha metall ilesip ketip jatyr, ol jaǵy beimálim. Máselen, onyń ishinde sirek kezdesetin rennii metaly baryna senimdimin, sol sekildi altyn, kúmis sekildi baǵaly metaldar qospasy bolady. Osynyń barlyǵyn eksportaýshy sertifikatta kórsetýi kerek. Ony anyqtaý esh qiyn emes, arnaiy qondyrǵylar bar. Biraq bizde olai etpeidi. Shyntýaityna kelgende, rýda túrinde shikizatty satýdan paida joq. Tiyn-teben ǵana. Tipti, sol rýda tasymalyna, kerisinshe memleket dotatsiia bóledi dese, oǵan men esh tań qalmaimyn", - deidi Muhtar Jákishev.
Aita ketsek, buǵan deiin áleýmettik jelide "Qazaqmys" kompaniiasy segiz ken orynyn sheteldik investorǵa satqaly jatqany týraly sybys qylań bergen bolatyn. Tipti, Parlament qabyrǵasynda da bul másele kóterilgen-tuǵyn. Óz kezeginde kúni keshe sirek kezdesetin metaldar ken ornyna bai otandyq kompaniia muny joqqa shyǵaryp, túsinikteme berýge májbúr boldy.
"Qazaqmys" óz ken oryndaryn satyp jatqan joq, onda da reseilik kompaniialarǵa bergen joq, Qazaqstannan sirek kezdesetin metaldardy eksporttamady da". Osylai dep málimdeme jasaǵan "Qazaqmys korporatsiiasy" JShS-nyń resmi ókili Arman Tleýkenov ózderiniń aqparattyq shabýylmen betpe-bet kelip otyrǵandaryn jetkizdi.
