"قازاتومونەركاسىپتىڭ" بۇرىنعى باسشىسى مۇحتار جاكىشيەۆ جەر استى بايلىعىن شيكىزات تۇرىندە ەكسپورتتاۋعا تۇبەگەيلى قارسى ەكەنىن مالىمدەپ، كەن تۇرلەرىن ەل ىشىندە وڭدەۋ دامۋعا سەرپىن بەرەتىنىن باسا اتاپ ءوتتى، دەپ حابارلايدى Dalanews.kz.
مۇحتار جاكىشيەۆ ءوز سۇقباتىندا قازاقستاننىڭ جاڭا تەحنولوگيالار ءوندىرىسى نارىعىنا شيكىزات جەتكىزۋدە زور مۇمكىندىگى بار ەكەنىن ايتادى. سوندىقتان ول جەر استى بايلىعى، اسىرەسە سيرەك كەزدەسەتىن مەتالداردى كەن تۇرىندە ەكسپورتتاۋعا تىيىم سالۋدى تالاپ ەتەدى. ونىڭ ورنىنا زاۋىتتار سالىپ، بۇل مەتالداردى وزىمىزدە وندىرسەك، بىرنەشە ەسە پايداعا كەڭەلەتىنىمىزدى جەتكىزەدى.
"ەلەكتروموبيل وندىرىسىنە نيكەل اۋاداي قاجەت. قازىرگى قولدا بارى حالىقارالىق كورپوراسيالارعا جوسپارداعى كولەم ءۇشىن جەتكىلىكتى. ءبىراق الداعى بەس جىلعا دەگەن جوسپارلاردا بۇل شيكىزات ءتۇرى تاپشى. سوندىقتان بۇل نارىقتا قازاقستاننىڭ الار ءوز ورىنى ءارى ۇلكەن مۇمكىندىگى بار. نەگىزىنەن، سيرەك كەزدەسەتىن مەتالدار توپتاسىپ، ارالاسىپ بىرگە جۇرەدى. ونى بىر-بىرىنەن اجىراتىپ الۋ، ارينە، كۇردەلى تەحنولوگيالىق جانە عىلىمي نەگىزدەمەنى قاجەت ەتەدى. وزگە ەلدەردەن ءبىزدىڭ ارتىقشىلىعىمىز دا سول، ونداي كەن ورىندارى بىزدە جەتىپ ارتىلادى. سوندىقتان تاجىريبە، زەرتتەۋ جۇرگىزۋدە بىزدە مۇمكىندىك وتە زور. وسىنى پايدالانىپ، ءبىز نيكەلدى اجىراتىپ الۋ جولىن تاپتىق تا. وندا دا كومىرسۋتەگىنسىز ءوندىرۋدى. ەڭ باستىسى، ءبىز ونى تومەن باعادا دا شىعىنسىز وندىرە الاتىن تاسىلگە سۇيەنەمىز. وسى جاعىنان العاندا، ءبىزدىڭ باسەكەگە قابىلەتتىلىگىمىز بۇل رەتتە جوعارى. سوندىقتان زاۋىتتار سالساق، جەتىپ جاتىر. ونىڭ تۇك قيىندىعى جوق. الايدا ءقازىر وعان باس قاتىرىپ جاتقان ەشكىم جوق. مىسالى، مىستى رۋدا تۇرىندە ەكسپورتتادى دەلىك. ال ونىمەن قانشا مەتالل ىلەسىپ كەتىپ جاتىر، ول جاعى بەيمالىم. ماسەلەن، ونىڭ ىشىندە سيرەك كەزدەسەتىن رەننيي مەتالى بارىنا سەنىمدىمىن، سول سەكىلدى التىن، كۇمىس سەكىلدى باعالى مەتالدار قوسپاسى بولادى. وسىنىڭ بارلىعىن ەكسپورتاۋشى سەرتيفيكاتتا كورسەتۋى كەرەك. ونى انىقتاۋ ەش قيىن ەمەس، ارنايى قوندىرعىلار بار. ءبىراق بىزدە ولاي ەتپەيدى. شىنتۋايتىنا كەلگەندە، رۋدا تۇرىندە شيكىزاتتى ساتۋدان پايدا جوق. تيىن-تەبەن عانا. ءتىپتى، سول رۋدا تاسىمالىنا، كەرىسىنشە مەملەكەت دوتاسيا بولەدى دەسە، وعان مەن ەش تاڭ قالمايمىن"، - دەيدى مۇحتار جاكىشيەۆ.
ايتا كەتسەك، بۇعان دەيىن الەۋمەتتىك جەلىدە "قازاقمىس" كومپانياسى سەگىز كەن ورىنىن شەتەلدىك ينۆەستورعا ساتقالى جاتقانى تۋرالى سىبىس قىلاڭ بەرگەن بولاتىن. ءتىپتى، پارلامەنت قابىرعاسىندا دا بۇل ماسەلە كوتەرىلگەن-تۇعىن. ءوز كەزەگىندە كۇنى كەشە سيرەك كەزدەسەتىن مەتالدار كەن ورنىنا باي وتاندىق كومپانيا مۇنى جوققا شىعارىپ، تۇسىنىكتەمە بەرۋگە ءماجبۇر بولدى.
"قازاقمىس" ءوز كەن ورىندارىن ساتىپ جاتقان جوق، وندا دا رەسەيلىك كومپانيالارعا بەرگەن جوق، قازاقستاننان سيرەك كەزدەسەتىن مەتالداردى ەكسپورتتامادى دا". وسىلاي دەپ مالىمدەمە جاساعان "قازاقمىس كورپوراسياسى" جشس-نىڭ رەسمي وكىلى ارمان تلەۋكەنوۆ وزدەرىنىڭ اقپاراتتىق شابۋىلمەن بەتپە-بەت كەلىپ وتىرعاندارىن جەتكىزدى.
