Jetisý oblysynda Naýryznama onkúndigi búgin Kórisý kúni – «Amal» merekesimen bastalyp, oǵan 1 myńnan astam adam qatysty. Bul rette Taldyqorǵandaǵy B.Rimova teatrynyń alańynda ótken is-sharaǵa 200-ge jýyq adam qatysyp, merekege jinalǵan qaýymdy oblys ákiminiń atynan orynbasary Dias Esdáýletov quttyqtady, dep habarlaidy Dalanews.kz
Óner ordasy aldyndaǵy alań ulttyq naqyshta bezendirilip, Taldyqorǵan teatrynyń ártisteri teatrlandyrylǵan kórinis usyndy. Kórinis barysynda ómirge kelgen sábige at qoiý rásimi atqarylyp, adamdardyń bir-birin qurmetteý salty kópshilikke pash etildi. Atap aitqanda, úlkenderdiń qushaqtasyp kórisýi, kelinniń sálem salýy, aqsaqaldyń bata berýi, balaǵa at qoiý siiaqty dástúrler dáripteldi.
Budan ári merekelik shara Jetisý oblysynyń Dánesh Raqyshev atyndaǵy filarmoniiasynyń kontserttik baǵdarlamasymen jalǵasty.
"Bala kezimizde naýryzda úlkender jaǵy bir-birimen qol alysyp, «Jasyń qutty bolsyn» dep qushaqtasyp jatatyn. Aýyl balalary úi-úidi aralap, úlkenderdiń bergen táttilerin qaltasyna syiǵyza almai, bala kóńilmen marqaiyp, bir jasap qalatynbyz. Kórisý merekesi negizinen elimizdiń batys oblystarynda keń taraǵan. Osy kúnniń Naýryz merekesiniń bastaýy retinde qaitadan jandanyp jatqanynan qýanamyz", - deidi Amal merekesine qatysqan aqsaqaldardyń biri Serik Nurhalyq.
Osy kúni oblystyń barlyq aýdan-qalalarynda merekelik kontsert, teatrlandyrylǵan kórinister, kezdesýler ótip jatyr.
Eske salaiyq, Prezidenttiń bastamasymen ótken jyldan beri 14-23 naýryz aralyǵynda Naýryznama onkúndigi belgilenip, onyń ár kúni óz ataýyna sai taqyryptardy dáripteidi. Onkúndiktiń basy 14 naýryz - Kórisý kúni, «Amal» merekesi dep ataldy. Bul adamdardyń bir-birine degen qurmeti artyp, ókpe-renishteri keshirilip, qushaqtasyp qaýyshatyn kúni.
