"Samuryq-Qazyna" ońtailandyrý mindetteri aiasynda enshiles qurylymy - "Samuryq-Qazyna Biznes Servis" JShS-in taratpaq, dep habarlaidy Dalanews.kz.
"Bolat Jámishevtiń tóraǵalyǵymen qordyń qoǵamdyq keńesiniń jańartylǵan quramdaǵy otyrysy ótti. Jiynǵa qor basshylyǵy, qoǵamdyq keńes músheleri, sarapshylar men qoǵam qairatkerleri qatysty. Sharada 2024 jyl boiynsha qor qyzmetiniń qorytyndylary men 2025 jylǵa arnalǵan josparlary talqylandy. Qor basshysy Nurlan Jaqypovtyń málimdeýinshe, memlekettiń ekonomikadaǵy úlesin azaitý tapsyrmasy aiasynda Basqarma qor qurylymyn ári qarai ońtailandyrý týraly sheshim qabyldaǵan. Osyǵan bailanysty qordyń enshiles uiymy "Samuryq-Qazyna Biznes Servis" JShS-in taratý týraly máseleni direktorlar keńesiniń qaraýyna usyný josparlanyp otyr. "Samuryq-Qazyna" qor tobyndaǵy aktivterdiń tiimdiligi men olardyń qunyn arttyrý, sondai-aq, beiindik emes aktivterden arylý boiynsha jumystardy jalǵastyrýda", – dedi Nurlan Jaqypov.
Kompaniiany taratý qoldanystaǵy zańnamamen bekitilgen tártip pen merzimde júzege asyrylady.
Sonymen qatar, ol 2021-2024 jyldary "Samuryq-Qazynanyń" ortasha jyldyq tabysynyń ósimi 13%-ǵa jetkenin, 2024 jyly qor memleket paidasyna 1,354 trln teńge tólegenin, bul portfeldik kompaniialardan túsken dividendter somasynan 6 ese kóp ekenin eske saldy.
Aita ketsek, 2024 jyly 27 qańtarda ótken Úkimettiń keńeitilgen otyrysynda Memleket basshysy "Samuryq-Qazyna" Ulttyq ál-aýqat qoryn reformalaý barysyna kóńili tolmaitynyn jetkizgen.
"Samuryq-Qazyna" aldyna qoiylǵan basty mindet – qordy reformalaý. Dese de bul baǵytta júrgizilip jatqan jumystyń nátijesin tabysty dep aitýǵa kelmeidi. Árine, birshama ilgerileý bar, biraq atqarar is áli de aýqymdy. Biz aqpan aiynda qordyń qyzmetin arnaiy talqylaityn bolamyz" – dedi Toqaev.
Negizi, "Samuryq-Qazyna" AQ 2008 jyly qurylǵan. Qordyń basqarýynda Air Astana, "Qazaqtelekom", "Qazatomónerkásip", "QazMunaiGaz", "Qazposhta", "Qazaqstan temir joly" jáne KEGOC siiaqty eldegi strategiialyq mańyzy bar iri kompaniialar bar. Prezidenttiń aitýynsha, olardy jańǵyrtý men tiimdiligin arttyrý – ekonomikanyń ósimine yqpal etetin mańyzdy sharalardyń biri bolmaq.
