Memleket basshysynyń Ulttyq quryltai otyrysyndaǵy sózi bastaldy, dep habarlaidy Dalanews.kz.
Eń aldymen prezident búgingi Amal kúnimen quttyqtady.
"Qystan aman-esen shyǵyp, aǵaiyn-baýyrmen kórisý – ejelden kele jatqan ata dástúrimiz. Bul kún – Áz-Naýryzdyń bastaýy. Elimizdiń tól merekesi biyl da qasietti Oraza aiyna orailas kelip otyr.
Qasterli meiramdarymyz halqymyzdy igi amaldar jasaýǵa úndeidi. Asyl qasietterimizdi keńinen dáripteidi. Quryltaidyń ulyq merekelermen qatar ótip jatqany – jaqsylyqtyń nyshany", deidi prezident.
Memleket basshysy:
«Osydan úsh jyl buryn naýryz aiynda arnaiy Joldaý jariialadym, ony bilesizder. Elimizdi túbegeili jańǵyrtý úshin aýqymdy reforma jasaitynymyzdy aittym. Sol kezde alǵash ret Ulttyq quryltai týraly bastama kóterdim.
Úsh jyldyń ishinde Qazaqstan jańa turpatty el boldy. Saiasi reformalar jan-jaqty ózgerister jasaýǵa múmkindik berdi. Jalpyhalyqtyq referendým arqyly Ata zańǵa túzetýler engizildi. Parlamenttiń quzyry keńeidi, Úkimettiń jaýapkershiligi artty. Adam quqyqtaryn qorǵaý júiesi jaqsardy. Konstitýtsiialyq sot quryldy. Sheshim qabyldaý úderisine azamattardyń belsene qatysýyna jol ashyldy. Basqa da baǵyttarda mańyzdy reformalar jasaldy»
Jergilikti bilik túbegeili jańǵyrtyldy
«Úsh jyldan astam ýaqyt ishinde aýyl ákimderiniń 72 paiyzy jańardy. Onyń úshten biri – buryn memlekettik qyzmette bolmaǵan azamattar. Bir sózben aitsaq, aimaqtardaǵy atqarýshy bilikke jańa adamdar kelip jatyr.
Pilottyq joba retinde aýdandar men oblystyq mańyzy bar qalalardyń 45 ákimi sailandy. Biyldan bastap barlyq aýdan ákimderin halyq tikelei sailaityn bolady. Túrli deńgeidegi máslihat sailaýy ókildi bilik organdarynyń jumysyna tyń serpin berdi. Oblystyq jáne aýdandyq máslihat depýtattarynyń 90 paiyzy bir mandatty okrýgten, iaǵni tikelei daýys berý arqyly sailandy. Bilik júiesinde mundai aýqymdy ózgeris buryn-sońdy bolmady».
Birqatar másele
«Endi birqatar máselege arnaiy toqtalyp ótkim keledi. Eń aldymen qoǵamda qyzý talqylanyp jatqan salyq reformasyna qatysty pikirimdi aitaiyn.
Salyq júiesi, bul – búkil memlekettik júieniń tiregi. Biýdjette qarjy bolmasa, memleket óz mindetin tolyq atqara almaidy, áleýmettik mindettemeler de oryndalmaidy. Bul týraly jańa ǵana belgili ekonomist Jaqsybek Qulekeev jaqsy aityp ótti. Sondai-aq Quryltai músheleri Qaiyrbek Arystanbekov, Marat Bashimov, Erlan Sairov, Rasýl Rysmambetov jáne Murat Ábenov salyq-biýdjet máselesine qatysty oryndy pikir bildirdi.
Elimiz úshin asa qajet sharalardyń mán-mańyzyn halyqqa egjei-tegjeili túsindirý kerek. Jurttyń bári ekonomist nemese qarjyger emes. Memlekettiń qandai sharany ne úshin qolǵa alyp jatqanyn bári birdei túsine bermeýi múmkin. Sondyqtan reformanyń mánin adamǵa túsinikti tilmen jetkizý kerek».
