Qaraǵandy oblysynda Qoǵamdyq keńestiń kóshpeli otyrysynda keńes músheleri EKSJ jobalaryndaǵy qazaqstandyq qamtýdy baqylaýdy kúsheitýge shaqyrdy.
Otyrys aldynda qatysýshylar Temirtaý men Qaraǵandydaǵy nysandardy aralady. Olar Temirtaýda jańartylǵan jylý magistralin tekserip, taǵy bir ýchaskedegi jumys barysymen tanysty. Qaraǵandyda delegatsiia «Qaraǵandy Sý» JShS-niń sý tazartý keshenine jáne sorǵy stantsiiasy bar M2 jylý magistraline bardy.
Kezdesý barysynda Qoǵamdyq keńes músheleri jobalardy júzege asyrýǵa qatysty birqatar máselelerdi kóterdi.
Talqylaýǵa Qoǵamdyq keńestiń tóraǵasy, Parlament Májilisiniń depýtaty Dúisenbai Turǵanov, «Óńdeý ónerkásibi odaǵy» ZTB atqarýshy direktory Ásel Dańǵylova, sondai-aq qoǵam qairatkeri, eńbek sińirgen energetik Petr Svoik qatysty.
Qazaqstandyq qamtý boiynsha talaptardy saqtaýǵa erekshe nazar aýdaryldy. Áseli Dańǵylovanyń aitýynsha, is júzinde osy normalardyń oryndalýyn baqylaýdyń naqty tetigi joq.
«Qazaqstandyq qamtý boiynsha normalar qarastyrylǵan, degenmen, olardy baqylaý tetigi qosymsha pysyqtaýdy talap etedi. Bul kórsetkishti qadaǵalaýǵa jergilikti atqarýshy organdar men merdigerlik uiymdar deńgeiinde júieli tásildi qamtamasyz etý mańyzdy», - dedi ol.
Oǵan jaýap retinde jergilikti atqarýshy organ ókilderi atalǵan baǵyt boiynsha baqylaýdyń kúsheitilgen rejimde júrgiziletinin habarlady.
Sondai-aq otyrysta Temirtaý jáne Qaraǵandy qalalarynyń ákimderi Ǵalym Áshimov pen Meiram Kojýhov, sonymen qatar Tabiǵi monopoliialardy retteý komiteti tóraǵasynyń orynbasary Anar Baitúkenova baiandama jasady.
Otyrysty qorytyndylai kele, Qoǵamdyq keńestiń tóraǵasy Dúisenbai Turǵanov jobalardy iske asyrýdyń ashyqtyǵy men tiimdiligin arttyrýǵa baǵyttalǵan birqatar usynys aitty. Máselen, 2026 jylǵa arnalǵan jumystardyń egjei-tegjeili kestesin usyný jáne rekonstrýktsiialaý barysy týraly turaqty túrde aqparattandyryp otyrýdy qamtamasyz etý usynyldy.
Eske salaiyq, 2025 jyly Qazaqstanda 8 tabiǵi monopoliia sýbektisi tozý deńgeii boiynsha «qyzyl aimaqtan» «sary aimaqqa» ótti. 2026 jyly taǵy 8 kásiporyn boiynsha osyndai ózgerister bolady dep josparlanýda.
Kommýnaldyq infraqurylymdy jańǵyrtý jalǵasýda: el boiynsha 2026 jyly 7,124 km elektr, 135 km jylý, 200 km sýmen jabdyqtaý jáne 98 km sý burýdy qosa alǵanda, 7,6 myń km jelini jóndeý josparlanyp otyr.
Anyqtama: «Energetikalyq jáne kommýnaldyq sektorlardy jańǵyrtý» ulttyq jobasy respýblika boiynsha 2029 jylǵa deiin iske asyrylady. Joba kommýnaldyq infraqurylymnyń tozýyn 40%-ǵa deiin tómendetýge jáne apat qaýpin 20% qysqartýǵa baǵyttalǵan.
