Búgin burynǵy din qyzmetshisi Iakov Vorontsovqa qatysty qylmystyq is boiynsha sot otyrysy bastaldy, dep habarlaidy dalanews.kz.
Oǵan ótkizý maqsatynsyz asa iri mólsherdegiesirtkiniń zańsyz ainalymyna qatysty aiyp taǵylyp otyr (QR QK-niń 296-baby 4-bóligi).
Protseske daiyndyq barysynda prokýratýra bastapqy aiyptaý aktisin qaita qarady. Alǵashynda I.Vorontsovqa tyiym salynǵan zattardy saqtaýmen qatar, esirtki ordasyn ustady degen de aiyp taǵylǵan bolatyn (QR QK-niń 302-baby 1-bóligi). Alaida qadaǵalaý organy bul aiypty alyp tastady – tergeý barysynda esirtkini birlesip tutynýǵa úi-jaidy usynýdyń bir ǵana faktisi anyqtalǵan. Al mundai áreketti tiisti bap boiynsha saralaý úshin onyń júieli túrde júzege asyrylýy talap etiledi.
Osylaisha, jańa aiyptaý aktisinde Qylmystyq kodekstiń 296-babynyń 4-bóligi ǵana kórsetilgen. Atalǵan norma ótkizý maqsatynsyz esirtkini, psihotroptyq zattardy nemese olardyń balamalaryn asa iri mólsherde zańsyz daiyndaý, qaita óńdeý, satyp alý, saqtaý jáne tasymaldaý áreketterin qamtidy. Tergeý nusqasy boiynsha, jinalǵan materialdar aiyptalýshynyń osy bap boiynsha kinásin tolyq kólemde dáleldeidi.
Eske sala keteiik, buǵan deiin jelide rezonans týdyrǵan video taraǵan bolatyn. Beinematerialda boljam boiynsha Iakov Vorontsov esirtkige uqsas ósimdik tektes zatty daiyndap, tutynyp otyrǵany kórýge bolady.
Alǵashqy sot otyrysynda memlekettik aiyptaýshy isti jabyq rejimde qaraý týraly ótinishhat bergen. Mundai qajettilik atalǵan is boiynsha memlekettik qorǵaý sharalary qoldanylǵan kýágerlerdiń qaýipsizdigin qamtamasyz etý qajettiligine bailanysty týyndap otyr.
