Qazaqstan Respýblikasy Prezidentiniń keńesshisi – Vitse-prezident Erlan Qarin ishki saiasat salasyndaǵy negizgi basymdyqtardy aiqyndap, salalyq memlekettik organdarǵa konstitýtsiialyq qundylyqtardy dáripteý baǵytyndaǵy jumysty kúsheitýdi tapsyrdy, dep habarlaidy dalanews.kz.
Erlan Qarinniń aitýynsha, ishki saiasattyń basty úsh baǵyty – konstitýtsiialyq qundylyqtar, jańa qoǵamdyq etika jáne bolashaqqa umtylys. Onyń ishinde konstitýtsiialyq qundylyqtar Prezident Qasym-Jomart Toqaev júrgizip otyrǵan reformalardyń strategiialyq negizi bolyp tabylady.
«Bul – Zań jáne Tártiptiń ústemdigi, jalpyulttyq birlik, etnosaralyq jáne konfessiiaaralyq kelisim, mádeniet pen bilim, ǵylym men innovatsiialar, eńbekqorlyq pen progress, qorshaǵan ortaǵa qamqorlyq jáne jaýapty patriotizm qundylyqtary», – dedi ol.
Osyǵan bailanysty Vitse-prezident memlekettik organdarǵa Prezidenttiń «Qazaqstan Respýblikasynyń ishki saiasatynyń negizgi qaǵidattaryn, qundylyqtary men baǵyttaryn bekitý týraly» Jarlyǵyn jáne Konstitýtsiiany ilgeriletý jónindegi is-sharalar josparyn sapaly iske asyrýdy tapsyrdy.
Sondai-aq Ata Zańnyń negizgi qaǵidalaryn túsindirý, konstitýtsiialyq qundylyqtardy nasihattaý jáne olardy qoǵam sanasyna ornyqtyrý maqsatynda júieli aqparattyq-túsindirý, saraptamalyq jáne mádeni-aǵartýshylyq jumystardy kúsheitý qajettigi atap ótildi.
Erlan Qarin jańa qoǵamdyq etikany qalyptastyrýdyń da mańyzdylyǵyna toqtaldy. Onyń aitýynsha, bul qoǵamda progressivti minez-qulyq úlgilerin ornyqtyrýdy, ulttyq qundylyqtardy nyǵaitýdy jáne tarihi faktilerdi burmalaýǵa qarsy turýdy kózdeidi.
Sonymen qatar «Zań jáne Tártip» qaǵidatyn tájiribede júzege asyrý, «Taza Qazaqstan» ekologiialyq bastamasyn keńeitý jáne «Adal azamat» tárbie baǵdarlamasyn tiimdi iske asyrý mindetteri belgilendi. Bul baǵyttaǵy jumysty jańa tásildermen júrgizý, sonyń ishinde biryńǵai tsifrlyq platformany, ulttyq tazalyq standartyn jáne óńirlerdiń tazalyq reitingin engizý usynyldy.
Vitse-prezidenttiń aitýynsha, úshinshi basymdyq – bolashaqqa umtylys. Ol ǵylym men bilimdi, innovatsiialar men tehnologiialardy, mádeniet pen aǵartýshylyqty damytý arqyly adam kapitalyn nyǵaitýǵa baǵyttalǵan. Bul rette «Qazaqstan balalary», «Oqityn ult», «Digital Qazaqstan» sekildi strategiialyq bastamalardy iske asyrý mańyzdy ról atqarady.
Erlan Qarin atalǵan úsh basymdyqtyń barlyǵy Qazaqstannyń qandai qoǵam quryp jatqanyn jáne eldiń bolashaq damý baǵytyn aiqyndaitynyn atap ótti. Onyń sózinshe, bul maqsattarǵa jetýdiń negizgi sharty – jasampaz kún tártibin qalyptastyrý jáne konstitýtsiialyq qundylyqtardy berik ustaný.
