Qasym-Jomart Toqaev birinshi "Ortalyq Aziia - Koreia Respýblikasy" sammitine qatysty, dep habarlaidy dalanews.kz.
Prezident kólik-logistika áleýetin nyǵaitýdy bir basymdyq dep sanaidy. Memleket basshysynyń aitýynsha, jahandyq jetkizý tizbeginde túbegeili ózgerister bolyp jatyr.
Osy tusta Shyǵys pen Batysty bailanystyratyn mańyzdy býyn retinde Ortalyq Aziianyń róli arta túsken.
"Qazaqstan óz aýmaǵy arqyly tasymaldanatyn tranzittik júk kólemin 100 million tonnaǵa deiin jetkizýdi kózdeidi. Bul rette Transkaspii halyqaralyq kólik baǵdaryn damytýǵa airyqsha mán beremiz, ony Orta dáliz dep te jii ataidy. Keiingi alty jylda osy kólik dálizimen tasymaldanatyn júk kólemi bes ese ulǵaidy. Taiaý jyldary baǵyttyń ótkizý qabiletin 20 million tonnaǵa deiin jetkizýge niettimiz. Bizdiń oiymyzsha, Orta dálizdi kólik salasyndaǵy TRIPP bastamasymen integratsiialaýǵa bolady. Lianiýngan portyndaǵy qazaq-qytai logistikalyq terminaly arqyly Ortalyq Aziia mýltimodaldi joldarymen júk jetkizetin Koreianyń da osy koordinattar júiesine qatysy bar. Sondyqtan bul baǵyttardyń áleýetin biriktirip, Koreiadan Ortalyq Aziia arqyly Eýropaǵa shyǵatyn kólik-logistika tizbegin qalyptastyrýǵa bolady dep oilaimyn. Osy oraida, Pýsan porty men Kaspii ailaǵyndaǵy Qazaqstan porttary arasyndaǵy tájiribe men aqparat almasý baǵytyndaǵy tyǵyz yntymaqtastyq jańa múmkindikke jol ashady", – dedi Memleket basshysy.
